Kyntu ka NESO ia u PM ka Ri ban pynkut noh ia ka jingsngap jar halor ka Manipur, dawa thaw Committee wanrah jingsuk

Syllad | The Rising MeghalayaSeptember 13, 2024

Ka North East Students’ Organization (NESO) ha ka 12 tarik Nailur ka la kyntu ia u Myntri Rangbahduh ka Ri u Narendra Modi ba un pynkut noh ia ka jingsngap jar ka jong u bad bad leit jngoh ia ka Jylla Manipur kaba la sakhi ia ka jingiaumsnam kaba la neh mynta lah 16 bnai.

Ha ka shithi sha u PM Modi bad u Myntri kam Pohiing ka Ri u Amit Shah, ka NESO ka la dawa ruh ban thung mardor ia ka High Level Peace Committee khnang ban lah ban ia pynbeit bad ban wanrah ia ka jingsuk kaba neh hapoh ka Jylla Manipur.

“Ngi Kyntu ia u Myntri Rangbahduh ka Ri ba un pynkut noh ia ka jingsngap jar ka jong u bad ban leit jngoh da lade ia ka jinglong jingman ha Manipur bad ruh ban aijingiada ia ki paidbah nongshong shnong jong baroh ar kynhun khamtam ki kynthei bad ki khynnah kiba la shah ktah jur na kane ka jingiakynad kaba dang iai bteng. Ki paidbah ka Manipur ki donkam ban iohi bad pdiang ia ki jingjynjar ki jong ki bad ban shim ruh ia ki sienjam ban pynkut noh ia kane ka jingiaumsnam,” ong u Chairman ka NESO u Bah Samuel B Jyrwa ha katei ka shithi.

U la ong ruh ba ka jingsngap jar kaba jlan jong u PM ka Ri u bym pat shym la leit jngoh ia ka Manipur naduh ba khie ka jingiakynad ka la nangpynjur ia ka jinglong jingman. Ka jingbym don ia ki nongialam kiba khlain bad kiba lah ban tuklar ka la pynplie ia kane ka jingiakynad ba kan nangjur shuh shuh bad wanrah jingeh ia ki paidbah nongshong shnong.

“Ka jinglong jingman ha Manipura ka la nangkham shyrkhei bad ka dawa ia ka jingphaikhmat ba mardor na ki kyrdan ba hakhliehduh jong ka sorkar. Ka jingpulom ban pynbeit ia kane ka jingeh kam pynthud tang ia ka jingskhem jong kane ka Jylla hynrei ruh ka buh ka jingma ia ka jingsuk bad ka jingshngain ha ka thain Shatei Lammihngi hi baroh kawei. Kumta ruh ka NESO ka khot mardor ia ka sorkar India ba kan tuklar khlem da pynslem na ka bynta ban wanrah pat ia ka jingsuk hapoh ka jylla,” ong u Bah Samuel Jyrwa.

“Ka NESO ka khot ruh ia ka sorkar India ban thaw ia ka High Level Peace Committee ka ban kynthup ia ki nongmihkhmat na baroh ki jaidbynriew khnang plielad ban shim ia ka rai ban ia pynbeit na ka bynta ban wanrah pat ia ka jingsuk kaba neh,” ong utei u nongialam.

Nalor kata u nongialam ka NESO u la ong ruh ba kane ka jingiakynad kaba la slem ka la wanrah ruh ka jingduh eh jong kiba bun ki mynsiem briew ba lui lui, ka jingshah pynjulor ki jingdon jingem bad kaba buh ha ka jingsyier ha ka jylla hi baroh kawei.

“Ka NESO ka pynrem jur ia kine ki kam iaumsnam namar ki long pyrshah ia ka jinglong jingman ha ka longbriew manbriew, ka jingsuk bad ka jingialong kawei. Ka jingnang jur jong ki kam thombor  kynthup halor ki jingjia kam thombor ba dang shen lyngba ki drone bad ki missile kala nang pynsniew shuh shuh ïa ka jinglong jingman.

Kiba kum kine ki buit ym tang ba kin pynjut ia ka jingshah pynjot, hynrei kin nangpynjur ruh ia ka jingiapher jingmut hapdeng ki kynhun jaidbynriew bad ka ban wanrah jingeh ban pynioh pat ia ka jingsuk. Ka NESO ka ieng ryngkat bad baroh kito ki briew kiba lka shah ktah bad sngewlem ruh halor ka jingduh jong ki mynsiem ki briew ba lui lui.

Kumjuh na ka liang u Bah Samuel u pynpaw ruh ba ka NESO ka iengskhem halor ka jingkut jingmut na ka bynta ka jingsuk bad hok ha Manipur bad ka thain Shatei Lammihngi hi baroh kawei.

“Ngi ngeit ba ki kam iaumsnam kim lah satia ban long ka lad ban weng ia kano kano ka jingiakynad bad ngi wer ia baroh ki jaidbynriew bad baroh kiba iadonbynta ban pdiang ia ka lynti jingiakren bad ban iatreilang ban pynneh pynsah biang ia ka shongsuk shongshngain. Ka NESO ka ieng bad ka kloi ruh ban iarap ia kino kino ki jingpyrshang kiba tei ban pynbeit ia kane ka jingeh kaba dang iai bteng khnang ban pynthikna ia ka lawei kaba skhem bad kaba shngaiñ na ka bynta ka Manipur,” ong shuh shuh u Chairman ka NESO.