Kyntu ka Secretary ka Tnat ka rep ka riang ka Sorkar ban kyntiew ia ka kam rep Krai

Syllad | The Rising MeghalayaSeptember 27, 2023

Ka Secretary ka Tnat ka rep ka riang ka Sorkar jylla ka Kong Isawanda Laloo ka la kyntu ia ki nongrep Krai (Millets) ka jylla ba kin kyntiew ia une u mar rep uba kongsan bha na ka bynta ka koit ka khiah bad uba lah ruh ban kyntiew ha ka liang ka ioh ka kot.

Ia kane ka Kong Laloo ka la pynpaw haba aijingkren kum ka Kongsan ha ‘Workshop cum Exhibition’ ba la pynlong da ka Tnat ka rep ka riang ka sorkar jylla mynta ka sngi Balang shibynta ka jingrakhe ia ka ‘International Year of Millets’ halor ka mat ‘Millets for Nutritional Security’ kaba la long hapoh All Saints Hall, Shillong.

Ka Kong Laloo ka la ong ruh ba hadien ka ‘green revolution’ ki nongrep ki la pynleit jingmut ban pynkhlain ia ka kam rep khaw bad kew, hynrei ki la leh klet noh ha kaba iadei bad ka jingrep ia u Krai  uba iarap shibun bynta ka koit ka khiah bad uba kham suk ban rep.

Kumta ruh ka la kyntu ia ki nongrep ba pyrshang ban rep bad ban wad bniah halor ka jingkongsan jong une u mar rep na ka bynta ka koit ka khiah bad ruh ban kyntiew ha kaba iadei bad ka jingrep ia une u jait jingthung.

Nalor kata ka la ong ruh ba na ka liang ka sorkar ka la pyrshang ruh ban pynhap ia Krai kum u jait jingthung ha ka ‘mission crop’ bad ruh ban pynshlur ia ki nongtrei kam lajong bad ki nongrep ba kin nang pynjur shuh shuh ha kaba rep Krai.

Shuh shuh ha kane ka prokram ki nongrep Krai na kylleng ka jylla ki la shah pynkup burom lyngba ka Kongsan.

Hadien kane na ka liang ka Kongsan ha ryngkat ki heh sorkar bad kiwei pat ki la pynlong ruh ka jingleit jurip ia kiba bun tylli ki stall kiba pyni ia kine ki mar rep