Kyntu ka Seng HYC ia ka DGP ka Jylla ba kan tuklar lem halor ka jingjyllei jong u drok

Syllad | The Rising MeghalayaMay 28, 2024

Ka Seng Hynniewtrep Youth Council (HYC) ka la aiti ia ka memorandum sha ka Director General of Police (DGP) ka Meghalaya ka Kong Idashisha Nongrang ha kaba ka la kyntu ba kan tuklar lem ha kaba iadei bad ka jingeh namar ka jingjyllei jong u drok hapoh ka Jylla.

Ha kane ka jingleit iakynduh ia ka DGP ka Jylla ha ka 27 tarik mynta u bnai, u President ka HYC u Bah Roy Kupar Synrem u la ong ba ka tnat pulit ka dei ban pynkhlain shuh shuh ia ki rukom treikam khnang ban lah ban tehlakam ia ka jingwan rung jong u drok shapoh ka Jylla.

“Ngi aijingmut ba ka tnat pulit ka dei ban shim da ki sienjam kiba tyngeh ban tehlakam ia ka jingwan rung jong u drok shapoh ka Jylla. Ngi aijingmut ruh ia ka tnat pulit ka Jylla, ki shipai Border Security Force kumjuh ia ka tnat Custom & Central Excise ba kin pynlong khah khah ia ki jingtalasi bad ruh ban iatreilang ha ka jingiakhun pyrshah ia ka jingjyllei jong u drok ha ka jylla, kumjuh ban ai ka jingiatreilang bad ki bor shnong bad ban talasi khah khah ha ki jaka rung jaka mih sha ka Jylla,” ong u president ka HYC.

Nalor kata u la ong ruh ba ka NDPS Act, 1985 ka la don lypa ia ki kyndon ba pyrkhing pyrshah ia ki kam khaii bad dih drok. Watla ki kam khaii drok ki dei ki bym lah ban lait jamin katkum ka Act, hynrei la iohi ha kiba bun ki khep ba ki nongkhaii drok ki ioh lait noh na ka jingshah set namar kiba bun ki sienjam ki bym biang. Ki don bun ki case jong ki briew bala pynngat ha ka NDPS hynrei ia kiba la hap pynkut noh namar ka jingbym treikam lane ka jingbym iahap ki kyndon.

“Ka jinglait shah pynsaja jong ki nongleh kam bymman hapoh ki case NDPS ka buh jingma shibun ia ka imlang ka sahlang bad ka pynduh mynsiem ruh ia ki paidbah ha kaba iadei bad ki rukom treikam jong ka ain. Kumta ka long kaba donkam ia ki Investigating Agencies/Prosecutors ba ki dei ban khmih bad pyntreikam bha ia ki kyndon ain kiba la don khnang ban poi sha ka thong kumba la angnud katkum ka ain,” ong u Bah Synrem. “Kumta ruh ban poi sha ka thong kaba katkum ka Act bad ban pynthikna ia ka rai pynrem jong ki briew kiba shah pynngat ha ki case NDPS, ki Enforcement agency ka Jylla ki dei ban tip bniah ia ki kyndon jong ka Act ha ka por ba pynlong ia ka jingtohkit khnang ba ka jingtian bishar kan long kaba iaid beit iaid ryntih.

Haba pynpaw halor ka jingdonkam ban pynsngewthuh ha kaba iadei bad ki kyndon halor ka jingioh pdiang ia ki mar tuh, u president ka HYC u la ong, “Ka Section 317 jong ka  Bharatiya Nyaya Sanhita, 2023 (Repealing the Indian Penal Code, 1860), ka ban sdang treikam naduh ka 1 tarik Naitung 2024 ka don ia ki kyndon pyrshah ia kino kino kiba thied ia ki mar tuh. U la ong ruh ba lyngba ki nongdih drok bad kiba haiing hasem jong ki, ki la ioh jingtip ruh halor ki jingjia ha kaba ki nongdih drok tang ban ioh pisa ban thied drok kim banse ban tuh na la ki jong ki iing ki sem da kaba die tad dor ia ki tiar ki tar.

“Kumta khnang ban pynshai paidbah ha kaba iadei bad kane ka kyndon ain ka Tnat ka dei ban ialap bad pynshai paidbah khnang ba ki paidbah kin sngewbha ba ka long beain ban thied ia ki mar tuh ba wan die da ki briew kiba kyrni ha ki jingdih drok,” ong shuhshuh u nongialam ka Seng.