Kyntu ka Sorkar ia ki samla kiba pule bad trei shabar ka Ri ban register ia lade

Syllad | The Rising MeghalayaAugust 3, 2024

Ka Sorkar Jylla ka la kyntu ia ki samla kiba pule bad kiba trei shabar jong ka ri ba kin pynrung kyrteng ne register ia lade ha ka portal ka sorkar Jylla ha kaba yn pynthikna ban buhrieh ia ki jingtip shaphang jong ki.

Haba kren sha ki lad pathai khubor ha ka 2 tarik Nailar, u nongaiktien ka MDA uba dei ruh u Myntri Sorkar, u Bah Paul Lyngdoh u la ong, “Ka jingpynrung kyrteng ia ki briew kumjuh ia ki samla kiba pule bad kiba trei shabar ka Ri ka dei ka sienjam kaba kongsan bha na ka bynta ka Sorkar Jylla.”

U la ong ba ia kane ka rai la shim hadien ki jingjia iaumsnam ba dang shen hapoh ka Ri Bangladesh ha kaba ki don bun bah ki nong Meghalaya kiba la hap ban phet krad noh na katei ka Ri.

“Ka jinglong jingman ka la long kaba klumar bha namar ha kaba nyngkong ngim don ia ka jingkhein halor ka jingdon jong ki nong Meghalaya kiba shong ba sah ne kiba leit shapoh Bangladesh. Kumta shisien ba la pynrung kyrteng ia lade kan pynsuk shibun ia ka Sorkar ban ioh jingkhein, bad khnang ba haba don kino kino ki jingjia na ka liang ka sorkar kan lah ban pynkloi ia ki sienjam kiba ka dei ban leh bad pyndep,” u la ong.

Watla katta u la bynrap da kaba ong ba kane ka jingpynrung kyrteng kam dei kaba pynbor. “Hynrei, ngi pynshlur ia ki ba kin pynrung kyrteng ia lade, hynrei yn buhrieh bha ia ki jingtip shaphang jong ki khnang ba ym don ki ban tip,” u la bynrap.