Kyntu ka Sorkar Jylla ia ka Sorkar Pdeng ban kyntiew ka jingmang rashon lyngba ka NFSA

Syllad | The Rising MeghalayaAugust 29, 2024

U Myntri ba khmih ia ka Tnad Food & Civil Supply & Consumer Affairs u Bah Comingone Ymbon haka 28 tarik u pyntip ba na ka liang ka sorkar Jylla ka la bteng ban kyrpad ia ka Sorkar Pdeng ban kyntiew shuh shuh ia ka jingioh bhah marbam rashon lyngba ka National Food Security Act (NFSA) ha ka Jylla khnang ban lah ban pynbiang marbam namar ka jingnangkiew ha ka jingdon ki nongshong shnong.

Hynrei, halor kane ka Sorkar Pdeng ka la pyntip ba kano kano ka jingpynkylla ha kaba iadei bad kane ka bynta hap ban ap tad haduh ka khanasamari ka ban pynmih thymmai.

Ia kane u la pyntip haba jubab ia ka call attention motion ba la wanrah da u MLA ka UDP na Mawkyrwat u Bah Renikton Lyngdoh Tongkhar uba la pynpaw ka jingsngewkhia halor ka jingeh kaba ki paidbah nongshong shnong ka Domtynrong ki iakynduh namar ka jingbym ioh ia ka marbam rashon.   

U la ong ruh, “Wat hadien ka jingiai kyrpad ka Sorkar Jylla ban nang pynrung shuh shuh ia ki nongioh jingmyntoi hapoh jong ka NFSA namar ka jingnang roi ka jingbun paid bad ban weng ia ki jingeh kumba la mad da ki nongshong shnong ka Domtynrong, hynrei na ka liang ka Sorkar Pdeng ka la iai ban ba kano kano ka jingpynkylla yn hap ban hap haduh ka khanasamari kaba thymmai.”

Nalor kata u la ong ba wat hapdeng kine ki jingpyrshang bad ka jingpyndep lut ia baroh ki bynta kiba donkam, hynrei ka jingpynrung ia ka shnong Domtynrong ha ka thup jong ki nongioh jingmyntoi na ka NFSA ka la shah ktah namar ka jingpynbeit ryntih ha ka bhah sam marbam jong ka sorkar India.

“Ka Sorkar India ka la ong ba ka Jylla ka la dep kynjoh lypa ia u pud ba la buh jong ka NFSA ia kaba la pynshong nongrim na ka jingioh jingkhein ka SECC 2011, bad kano kano ka jingpynkylla ban kynthup shuh shuh ia ki nongioh jingmyntoi yn hap ban ap haduh ka khanasamari kaba thymmai kaba la shah pynthud noh hadien jong ka khlad Covid-19, u la bynrap.

Naduh u snem 2011, ka Meghalaya ka la sakhi halor ka jingkiew jong ka jingbun paid ha kaba la antad ba ka jingdon jong ki nongshong shnong haduh u snem 2023 ka long haduh kumba 38.16 lak haba ia nujor bad ka 29.17 lak ba la rekod da ka SECC 2011.    

Kumta ruh kane ka jingkiew ha ka jingbun paid ka la nangpynjur ia ka jingdawa mar bam hapoh jong ka NFSA kaba la nang buh jngeh ban pynbiang marbam rashon.

Halor kine ki jingeh u Myntri u la ong ba ka Tnad ka la shim katto katne ki sienjam ban weng ia kane ka jingeh bad ban pynthikna ba ki nongshongshnong ba shisha kin ioh ia ki hok kiba dei jong ki katkum ka National Food Security Act.