Kyntu ka sorkar Meghalaya ban ithuh ia ka Shillong Airport kum ka International Airport

Syllad | The Rising MeghalayaJuly 29, 2023

U Myntri Rangbah ka Meghalaya u Conrad K Sangma u la buh ka jingkyrpad ia ka Ministry of Civil Aviation ban pynbna bad ithuh noh ia ka kad liengsuin Shillong Airport kum ka International Airport.

Haba kren ha ka jingialang ‘20th Annual Conference of Commonwealth Parliamentary Association (CPA) Conference’ kaba la long haka Saitjain, u Myntri u la ong ba ki don haduh kumba 10,000 ngut ki nongleit jingleit man la u bnai, bad ka Shillong airport ka dei kaba pyniasoh beit beit shapoh Delhi, Kolkata, Aizawl, Agartala, Imphal, Dimapur, Dibrugarh bad Guwahati.

“Da ka jingiarap jong ka sorkar India, ngi la shim ia ki sienjam ban kyntiew ia ka Shillong airport na ka bynta ki liengsuin kiba kham heh. Nalor kata ngi la kyrpad ruh ia ka Ministry of Civil Aviation na ka bynta ban pynbna ia ka Shillong Airport kum ka  International Airport khnang ban pynbha bad kyntiew shuh shuh ia ka jingpyniasoh bad ki ri kiba don ha ki thain khappud ki jylla ka thain shatei lammihngi (Northeast) bad ka ban kyntiew shibun ia ka “Act East Policy,” ong u CM ka jylla.

Ha kajuh ka por u ai khublei ia ka sorkar India namar lyngba ka ‘Act East Policy,’ la lah ban pyntreikam ia kiba bun ki projek ba la bei tyngka da ka Ministry of External Affairs, kata ha ka jingpyniasoh ia ki jylla ka thain Northeast bad ki ri ba marjan kum ka Myanmar bad ka Bangladesh.Kane ka kynthup ruh wat ha ka jingiadei bad ka jingshna ia ki lynti kiba pyniasoh na ka bynta ka roi ka par.

U CM ka jylla u la ong ruh ba ka jingiatreilang ha ki kam karkhana bad hapdeng ki sorkar kan lah ban kyngtiew ia ka roi ka par hapoh ka thain, kata da kaba khmih ruh halor ka jingpyniabiang bad halor ki jingma kiba la don lypa hapoh ka thain.

“Da kaba shim nuksa na ki ri kiba rit hapoh Europe bad Asia kiba la lah ban kyntiew shaphrang ia  ka ioh ka kot lyngba ki jingdon jingem ha ka mariang bad kiwei pat, kata da kaba khmih halor ki jingiada ia ki mrad khlaw bad ki jingdon jingem hapoh jong ka, kane kan kyntiew shibun ia ka ioh ka kot jong ka thain Northeast,” u la ong shuh shuh.                               

Nalor kata u CM u la ong ruh ba watla kane ka thain ka la wanrah ka jingeh ha kaba iadei bad ka jingkiew shakhmat jong ka roi ka par, hynrei ka don pat ia ka bynta kaba kongsan haba phai sha ki lad ki kabu kiba ka don kumjuh ha ka liang ka kolshor, ka jinglong ki jaka puta bad kiwei pat kiba lah ban kyntiew ia ka roi ka par ba ka khaii ka pateng ba ki ri ka ASEAN.

Kumjuh u CM Conrad Sangma u la ai khublei ruh ia u Myntri Rangbahduh bad ia ka sorkar India halor ka jingwanrah ia kiba bun ki rukom treikam kum ka  Gati Shakti, UDAN bad halor  ka jingkiew ki kam karkhana hapoh kane ka thain Northeast.U la ong ruh ba na ka liang ka sorkar ka la pynjur ia ka jingbei tyngka na ka bynta ban kyntiew ia ki kam jngohkai pyrthei, kam karkhana, ka jingpynmih ia ki marbam bad kiwei pat.

Ha kaba iadei bad ka jingpyniasoh ka ban pynlong ia ka  thain Northeast ka ban mar ia ryngkat bad kiwei pat ki jaka jong ka ri India, u Sangma u la ong ba ka thain Northeast India ka don ia ka thong ban pyniaid shakhmat ia ka jingiohi jong ka sorkar India kumba la kdew ha ka Act East Policy.

U la ong ruh ba kane ka thain ka don kyrhai ki mar umphniang, natural gas, dewiong bad u mawshun bad ruh ki jaka ia kiba la pyndonkam ha ka rep ka riang.Shuh shuh u CM Sangma u la ong ruh ban pynkhlain ia ka jingiadei bad ka Bangladesh ka jylla ka la trei borbah ban pynkhlain ia ka kam khaii pateng ha ki jaka khappud.