Kyntu ka SWSRJ ban pynneh iaka shongsuk shongsain haka Election MP
Ka Synjuk Waheh shnong Ri Jaintia (SWSRJ) ka kyntu iaki nongshong shnong kumjuh ki nongialam shnong ka rilum Jaintia kynthup ka East bad West Jaintia ban iatreilang bad ki bor pyniaid District ha kane ka ilekshon MP kaba long haka 19 tarik Iaiong.
U President Synjuk Waheh shnong Ri Jaintia Bah Arminius Lipon, ula ong ka synjuk ka kyntu iaki nongshong shnong bad nongialam shnong ban long ki briew kiba don ka akor burom bad ri syndong iaka jingsynshar haki dong ki shnong khnang ba ka ilekshon shaka dorbar bah jong ka ri kan long kaba iaid beit iaid ryntih bad kaba jop khlem da don ka jingpeit shilliang khmat iano iano.
La kyntu ruh iaki nongshong shnong ban nym thaw ia kino kino ki jingklumar ki lah ban pynwit ia kino kino ki kam kiba wanrah iaka jingsniew dur hapoh jong ka rilum Jaintia.
Ka synjuk kala kyntu ruh iaki waheh shnong ka rilum Jaintia ban kiar na kaba buaid politic hynrei ban long ki nongialam kiba sian haka synshar khadar shnong.
Nalor kata ka synjuk kala kyntu lang ruh ia baroh ban long ki nongshong shnong kiba peitngor khnang ban lait na kano kano ka jingjia khamtam haka sngi thep vote.
La kyntu ruh iaki nongshong shnong ka rilum jaintia kiba shong ba sah sha khappud jong ka jylla Assam ba kin wan thep iaka vote jong ki.
Ka synjuk ka la kyntu jur iaki waheh shnong ban pynbiang iaki jingdonkam kum ka bording, ka um bad kiwei ki jingdonkam na ka bynta ki briew jong ka sorkar kiba wan haki shnong ki thaw ban pyniaid iaka ilekshon.
Facebook
Instagram
Youtube
Twitter
Leave a Reply