Kyntu ka VPP ia ka Sorkar ba kam dei ban ai jingbit ia ka ‘Yatra’ ka seng Hindu ha Shillong

Syllad | The Rising MeghalayaSeptember 16, 2024

Ka liang pyrshah Voice of the People’s Party (VPP) ha ka 16 tarik Nailur ka la kyntu ia ka Sorkar Jylla ba kam dei satia ban aijingbit ia ka seng Hindu ba kan pynlong ia ka ‘Gau Dhwaj Sthapana Bharat Yatra’ ban ialap halor ka jingkhang bam doh Masi ia kaba la pynbeit ban pynlong ha ka 2 tarik u Risaw u ban wan ha ka nongbah Shillong.

Ka VPP lyngba u General Secretary uba dei ruh u MP ka Shillong u Dr Ricky AJ Syngkon ka la phah da ka shithi sha u Myntri Rangbah ka Jylla u Conrad K Sangma da kaba ong, “Da kaba pyrkhat halor ka rukom long ka imlang sahlang ka jylla jong ngi, ngi kyntu jur ia ka Sorkar ba kam dei satia ban ailad ban pynlong ia kane ka Yatra. Ka jingshngain, ka shongsuk shongsain bad ka jingiatylli jong ki paidbah ka Meghalaya ka dei ban long ka mat kaba kongsan tam jong ka Sorkar, bad kino kino ki jingjia kiba pynshong syier ban pynthut bad buh jingma ia kine ki jinglong ym dei ia ka ban shah be ailad da lei lei ruh.”

“Watla ngi kyrshan pura bad pynneh ia ka nongrim jong ka jinglaitluid ha ka jingngeit niam katkum ki kyndon hapoh ka Riti Synshar khadar ka jong ngi, ngi sngewkhia jur ia ki jingktah kiba lah ban mih na kum kane ka jingialang kaba lah ban ktah ia ka shongsuk shongsain ha ka Jylla jong ngi,” u la ong da kaba bynrap ba ka VPP ka ngeit ba ka jinglaitluid ba shimet ha ka jingngeit niam, hynrei lada ka jingleh niam ba laitluid ka ktah pat ia kiwei lane ka pyrshang ban pyntreikam ia ka jingngeit halor kumno ba ki briew ki dei ban bam, kumno ki dei ban im lane wat kumno ba ki dei ban ngeit, kumta ruh kiba kum kine ki jingpyrshang ki buh ka jingma kaba khraw ia ka tynrai jong ka imlang sahlang ka jong ngi.  Ka Meghalaya ka dei ka jylla kaba la tip bha halor ka jingdon ki jaidbynriew bapher bapher, ka jingsuk bad ka jingburom markylliang.

Nalor kata u la ong ruh ba ia kino kino ki bynta kiba lah ban pynmih ia ka huri hura lane ka jingiakynad hapdeng ki jaidbynriew bapher bapher dei ban pyrkhat sani bad bad long husiar.

“Ngi sngewkhia jur ba kane ka jingthmu ban pynlong ia kane ka Yatra ka lah ban wanrah ia ka jingiapher bad pynthut ia ka shongsuk shongsain hapdeng ki kynhun jaidbynriew ha Meghalaya.Dei ban burom ia ka kolshor jong ki jaidbynriew bapher bapher ha ka jylla jong ngi, bad ngim lah ban ailad ia kiba kum kine ki prokram kiba lah ban pynthut noh ia kane ka jingiaburom markylliang,” ong u Dr Syngkon.