Kyntu ka WJSU iaka NHIDCL ban sangeh theh khyndew sha Wah Umngot

Syllad | The Rising MeghalayaSeptember 28, 2024

Ka War Jaintia Student’s Union (WJSU) kala kyntu na ka NHIDCL ban sangeh iaka jingtheh khyndew sha ka wah Umngot bad ban pynbha iaka lynti iaid kjat u mynbarim ba la shna da u maw.

Haka shithi kaba la phah ha u Project Manager NHIDCL haka 26 tarik Nailur, ka WJSU lyngba u Joint Secretary Overnas Lyngniar, ula pynpaw ka jingsngewkhia halor ka jingtheh khyndew kaba dang shen harud ka wah Umngot naka jingshna pynheh iaka surok Shillong-Tamabil kaba dang iaid shakhmat.

Ula ong ba kane ka jingleh ka NHIDCL ym tang ba ka pynjulor iaka mariang hynrei ka pynjot ruh iaki lynti iaid kjat u mynbarim kaba long tang kawei ka lynti iaid kjat kaba kongsan na ka bynta nongshong shnong jong ka shnong Amkoi, Nongbareh, Khonglah Kudengrim Darrang bad Shnongpdeng kaba pyniasoh bad ka shnong Dawki.

Shuh shuh kane ka jingpynjot iaka lynti iaid kjat, ka ktah iaki nongshong shnong haka leit ka wan bad ka kit ka bah na ka bynta ban pynpoi iaki mar bad kiwei kiwei ki jingdonkam shaki iew ki hat bad kala dawa ban pynshna biang ia kane ka lynti shwa ban pyndep iaka projek surok Shillong Dawki.