Kyntu ki ADC ka North East ia ka Sorkar Pdeng ban pynkloi halor ka jingpynkylla ia ki kyndon ka Sixth Schedule

Syllad | The Rising MeghalayaAugust 11, 2024

Ki nongialam jong ki 10 tylli ki Autonomous District Council (ADC) jong ka ka thaiñ shatei Lammihngi kila iakynduh lang ha ka 10 tarik Nailar ha nongbah Shillong ha kaba kila shim ia ka rai ban thaw ia ka Committee na ka bynta ban buddien halor ki mat jingdawa ka sorkar pdeng ban pynkylla ia ki kyndon jong ka Sixth Schedule jong ka riti synshar ri.

Na ka liang u CEM ka KHADC u Bah Pyniaid Sing Syiem u la ong ba ki nongialam jong baroh ki 10 ADC ki la leit iakynduh ia u u Myntri Kam Pohiing ka Sorkar Pdeng u Amit Shah ha Delhi ha kaba ula ai ka jingkular ba hapoh shi bnai yn pyndep noh ia kane ka kam ha kaba kan don ka Committee ka ban  pyndep pura noh ia ki jingdawa jong ki District Councul hashwa ban rah sha Parliament .

“Ka jingiakren mynta ka sngi ka la iaid halor ka jingdonkam ban buddien ia ka jingiakynduh jong ngi dang shen bad u Shah ha New Delhi. Katkum kane, ngi la rai ban thaw ïa ka komiti ban pynthikna ïa ka jingïatylli jong baroh shiphew tylli ki ADC halor katei ka kam. Ngin sa pynbna hadien ia ka kyrteng jong kane ka komiti”, u la ong.

“Kane ka komiti kan ialam ia ka kynhun jong ki 10 tylli ki ADC na ka thain NE ban buddien ia kane ka kam namar da kawei ka sur ngi la rai ban iatylli ban kyntu ia ka Sorkar India ba kan pynsted ia kane ka kam,” la bynrap biang u Syiem haba pyntip ba ia kane ka Committee yn khlieh da u kum u chief convener bad u Chairman jong ka The Indigenous Progressive Regional Alliance (ba la tip ruh kum ka TIPRA Motha) u Pradyot Manikya Deb Barma bad u Elwin Teron jong ka Karbi Anglong Autonomous Council (KAAC) kum ki nongai jingmut ha ryngkat ki dkhot na baroh 10 tylli ki ADC.

Haba kylli, u Bah Pyniaid u la ong, “U myntri kam pohïing ka sorkar pdeng u la pynthikna ïa ngi ba hapoh shibnai baroh ki jingdawa jong ki shiphew tylli ki ADC yn sa pynbeit shwa ban wanrah ïa ka (jingpynkylla) ha ka ïingdorbar dorbar.” Katkum ka jingong jong u, ki khmih lynti ba ïa kane ka aiñ ba la tyrwa ban pynkylla yn wanrah ha ka dorbar parliament ban wan ka ban long ha u bnai Risaw ne Naiwieng u ban wan.

U CEM ka KHADC u la pyntip shuh shuh ba ka Bodoland Territorial Council (BTC) ka la rai ban ai jaka sha baroh shiphew tylli ki ADC na ka bynta ban shna ïa la ki jong ki Guest House Lane ki Ophis jong ki katba ka Tripura Tribal Areas Autonomous District Council ka la mynjur ban buh ïa ka jaka pule da ka English medium ban long la ai kyrteng da u nongialeh laitluid Khasi U Tirot Sing Syiem ha North Tripura, kaba shong ba sah da ki paid Khasi-Pnar.

Kham mynshwa haba ïakren bad ki nongthoh khubor, u heh ka Tripura Tribal Areas Autonomous District Council u Purna Chandra Jamatia u la ong, “Mynta ka sngi ka dei ka jingïalang buddien ban pynthikna ba kino kino ki jingkular ba la ai da ka sorkar India yn pyndep ha ka por ba la buh.”

U la ong, “Bunsien ngi la don ka jingbym ïatreilang hapdeng ki riewlum trai ri jong ka thaiñ shatei lammihngi, ki trai ri trai muluk jong ka thaiñ shatei lammihngi bad kumta ïa ka sur jong ngi ym ju ïohsngew ha ka rukom kaba ïaryngkat ha Delhi. Kumta ngi la rai ba lada ngi kren marwei marwei, ngin ym ju lah ban pynurlong ia kaei kaei kaba ngi kwah kumta lada ngi lah ban pyniasoh lang ia ka bor bad ka bor jong ngi bad ban buh jingeh ia ka sorkar India, kin hap ban sngap ia ka jingdawa jong ngi.”

Nalor kata u la ong ruh, “Ngam ïohi kano kano ka daw balei ba kim lah ban leh ïa kata. Ka seng Congress kaba don ha ka liang pyrshah ka la mynjur ban kyrshan ia ka 125th Amendment ka sorkar synshar ha ka manifesto jong ka ka la ong ba kin pyntreikam ia ka jingpynkylla ia ka 125th Amendment kumta shano ka jingpynslem. Lehse ka jingpynslem ka long namar ba ngim kren tyngeh bad ngim iakren bha ia ka hok jong ngi bad ka sorkar India kumta ka jingpyrshang jong ngi kan long ban ai pura ia ka imlang sahlang jong ngi sha ki trai ri trai muluk jong ngi na kylleng ka thain. Ka por ka la dei ba baroh ngi dei ban kren na ka bynta ki briew jong ngi ban ia kaba kren na ka bynta ki party jong ngi. Kata ka dei ka mat kaba kongsan.”