Kyntu ki Nonghikai SSA ia ka jingtuklar lem u Vice President ka Ri India halor ka jingdawa pynkiew tulop

Syllad | The Rising MeghalayaOctober 16, 2024

Ki nonghikai SSA kiba don hapoh ka shatri jong ka All Meghalaya SSA School Teachers’ Association (AMSSASTA) bad kiba dang bteng ia ka jingiakhih ki la kyntu ia ka jingtuklar lem jong u Vice President ka Ri India u Jagdeep Dhankhar ha kaba iadei bad ka jingdawa pynkiew tulop ba 100 percent na ka bynta ki nonghikai SSA.

Ka jingiakhih jong ki nonghikai SSA da kaba shong kyllain mungor ka la kynjoh mynta sha ka 16 sngi.

Ha ka dorkhas sha u Vice President ka Ri u Jagdeep Dhankhar, u president ka AMSSASTA u Bah Peter Thyrniang u la ong, “Ngi kyrpad ia phi ba phin tuklar lem mardor ha kaba iadei bad ka jingpynkiew ia ka tulop jong ki nonghikai Samagra Shiksha Abhiyan.”

U la pyntip ruh ba watla ka seng ka la aiti ia ki dorkhas bapher bapher ha kaba iadei bad kane ka phang naduh u snem 2019, hynrei kam shym la don satia kano kano ka jubab na ka liang ka Sorkar Jylla kat haduh kine ki sngi.

“Ka la iaid mynta lah palat 8 snem naduh ba la pynkiew khatduh ia ka tulop jong ngi. Naduh ba la pyntreikam ia ka skhim SSA hapoh Meghalaya, ka tulop jong ki nonghikai ka ju kiew man la ka ar ne saw snem. Ha u snem 2008, la pynkiew ia ka tulop na ka T.1,500 sha ka T. 3,000 (100%), ha u snem 2010 la pynkiew na ka T.3000 sha ka T.6200 (100%), ha u snem 2013 la pynkiew na ka T.6000 sha ka T.9,200 na ka bynta ki nonghikai LP (53.3%) bad T.9,900 na ka bynta ki nonghikai UP (65%), ha u 2016 la kyntiew na ka T. 9,200 sha ka T.19,044 (107%) na ka bynta ki nonghikai LP bad T.9,900 sha ka T.20,493 (107%) na ka bynta ki nonghikai UP. Hynrei naduh u snem 2017 haduh u bnai Nailur 2024 kam shym la don shuh ka jingpynkiew tulop,” ong u Bah Thyrniang.

“Haba phai sha ki jingeh ha ka liang ka ioh ka kot, ka jingeh ba khraw ha ki longiing longsem bad na ka bynta ki khun kiba bteng ia ki jingpule kiba kham shalor ha ki bynta bapher bapher jong ki jingpule, ka jingkiew dor jong ki mar ki mata ki la wanrah shibun ki jingeh ia ngi kum ki nonghikai, kumta ruh ngi ngeit skhem ba kane ka jingdawa pynkiew tulop ka jong ki ka dei kaba shonghok da kaba pynshong nongrim ruh halor ka jingnoh synniang ka jong ngi sha ka pule puthi bad ka jingaiti lut na ka bynta ka kam,” ong u nongialam ka Seng ha ka shithi.

“Kumta ki artylli ki jingdawa kiba kongsan jong ngi ki long, ka jingpynkiew ia ka tulop bad ka jingpynskhem ia ka kam da ka sorkar. Ka seng ka la jied ban dawa pynkiew tulop namar ka dei kaba donkam kyrkieh katkum ka por bad na ka bynta ka jingim jong ngi ha kaba kum kane ka por ba jur ka jingkiew dor ha kaba ma ngi kum ki nonghikai SSA ngi la mad ia ki jingeh ban pyndap pynbiang ia ki jingdonkam ha la ki iing ki sem bad ki khun ki kti kiba pynkhreh ban bteng ia ki jingpule kiba kham shalor. Ka Central Executive Committee kaba la long ha ka 7 tarik u Nailur ba la dep ha Nongstoin, ka la rai da kawei ka sur ban dawa shispah na ka shispah ka jingpynkiew tulop kum ka jingdawa ba hakhmat eh jong ngi” u la bynrap.