Kyntu pynneh shongsuk shongsain bad iaka rai ialap elekshon: Synjuk ka Waheh Shnong Ri Jaintia

Syllad | The Rising MeghalayaJanuary 17, 2025

Ka Synjuk ki Waheh Shnong Ri Jaintia kala kyntu ia baroh ki nongialam shnong bad paidbah nongshong shnong jong ki ar District ka Rilum Jaintia ban pynneh iaka shongsuk shongsain hapoh ki shnong ki thaw khamtam hakum kane ka aiom Elekshon MDC sha ki artylli ki Autonomous District Council (ADC) ka ban long haka 21 tarik Rymphang.

U President ka Synjuk u Ma Arminius Lipon ula ong, mynta ka la poi biang ka aiom Election ban jied iaki nongmihkhmat sha ka Jaintia Hills Autonomous District Council (JHADC), kumta ka Synjuk ka kyntu iaki nongialam shnong ban iatreilang khlem don ka jingñiew shilliang ia uno uno ne kano kano ki kyrtong.

Ula ong ba haka por elekshon ki don ki waheh shnong kiba shah ialam bakla bad la kyntu ba kano kano ka rai shnong kaba ki shim kan dei na ka bynta ka bha ka miat jong ka shnong ka thaw.

Na ka bynta ka jingialap elekshon hapoh ki shnong ki thaw, u Ma Lipon ula pynkynmaw iaki Waheh Shnong ka Rilum Jaintia ban pyntreikam iaka rai jong ka Synjuk kaba la dep shim ha u snem 2022 ban shah tang 4 tylli ki kali kynthup jong u kyrtong, bad ruh ym shah ïa kino kino ki kyrtong ban ïalam bun ngut ïaki nongkyrshan, namar ka wanrah jingeh ïa u kyrtong haka jinglut jingsep, ka jingsahkut kali bad ruh ban pynneh iaka jingkhuid jingsuba nalor kiwei kiwei.

Ai khublei ka Synjuk Waheh Shnong Ri Jaintia ba rung ka ktien Pnar haka State Anthem

Nalor kata ka Synjuk kala kyntu ruh ia baroh ki nongshong shnong ka rilum Jaintia ban burom iaki Dorbar shnong khnang ba ka elekshon sha ka iingdorbar thawain jong ka JHADC kan long kaba iaid beit iaid ryntih khlem kano kano ka jinghuri hura.

Shuh shuh ka Synjuk kala kyntu jur ia uno uno ne kano kano ki kyrtong kumjuh ki seng sain hima sima haba ki wan ialap elekshon hapoh ki shnong ki thaw ban kiar na ka jingkynthoh kynnoh iaki Waheh Shnong khlem don ka daw ne sakhi satar kiba biang namar ka ktah iaka kam hapoh ka imlang sahlang.