Kyntu sangeh shah thngan u Dy CM ia ka Kong Bindas, kular iakren sha Delhi ban pyllait song pisa

Syllad | The Rising MeghalayaJune 11, 2024

U Symbud Myntri Rangbah ka Jylla uba khmih ia ka Tnat PWD (Roads) u Bah Prestone Tynsong haka 10 tarik Jylliew u la kyrpad ia ka Kong Binda Syiem ba kan sangeh noh ia ka jingshah thngan bad pynthikna ruh ba ka sorkar kan shimkhia ban iakren bad ka Sorkar Pdeng na ka bynta ban pyllait noh ia ka mang tyngka ba T.100 klur ban shna pynheh ia ka surok kaba 20 km na Nongpoh sha Umden kumjuh ia ka surok kaba 39 km na Umden sha Lum nongrim.

Kane ka jingkular jong une u Myntri ka la wan long ruh hadien ba ka longkmie ka Kong Bindas Syiem kaba dei na ka shnong Umden, Ri Bhoi District ka la bteng ban pynlong ia ka jingiakhih shah thngan mynta lah san sngi knthih ban dawa ban shna thymmai ia ka surok Nongpoh – Umden shaduh Sonapur kaba la jot rathai.

Haba kren sha ki lad pathai khubor, u Bah Tynsong u la pyntip ba ha u bnai Lber 2024, ka sorkar Jylla ka la dep ban phah da ka jingthoh sha ka sorkar India lyngba ka North Eastern Council (NEC) ha ka Ministry for Development of the North Eastern Region (DoNER) na ka bynta ban pyllait ia ka song jingiarap pisa na ka bynta ban shna pynheh ia ka surok ba 20 km na Nongpoh sha Umdei ha ka jinglut ka ban kot sha ka T.51-51 klur.

“Ka jingpynkhreh ia ka detailed project report (DPR) ka la iaid shakhmat bad ha kine ki khyndiat sngi ki ban wan Nga ngeit ba ngin lah ban aiti noh ia ka DPR sha ka tnat Planning bad hadien ngin sa phah sha ka NEC bad ka NEC kan sa phah sha ka DoNER,” ong u Bah Prestone, kata da kaba ong ruh, “Manga ha ryngkat u Myntri Rangbah ka Jylla ngin sa leit ban iakynduh ia u Myntri ka DoNER ryngkat bad ki ophisar jong ka Ministry khnang ban pynbor na ka bynta ban pyllait noh mardor ia ka mang tyngka na ka bynta kane ka project.”

U la ong ruh ba ka sorkar ka la tyrwa na ka bynta ban pynkylla noh ia ka surok na Nongpoh sha Umden sha ka ‘Intermediate Lane’ ym shuh kum ka ‘Single lane’ namar ba ki la dep ban buh jingkhein lypa ha kaba iadei bad ka jingdon jong ki kali kiba iaid lyngba ha kane ka thain.

Nalor kata u Bah Prestone u la pyntip ruh ba ka skhim ha kaba iadei bad ka kylla kaba ar jong ka project na Umden sha Lum nongrim (39 km) ka ban pyniasoh bad ka National Highway haduh Byrnihat ka dei kaba la dep lypa ban shah kynthup ha ka PMGSY-III ha ka jinglut ka ban kot sha ka T.50-51 klur.

“Ka jinglut jingsep baroh na ka bynta kitei ki artylli ki project kan kot sha ka T.100 klur. Nga ngeit skhem bad kine ki surok kan iarap shibun ia ki nongshong shnong jong ka thain kiba don naduh na Nongpoh, Umden shaduh Lum nongrim,” ong u Bah Tynsong.

“Lyngba kane ka jingpynshai, Nga kwah ban kyrpad ia I Kong Bindas Syiem ba i dei ban sangeh noh ia ka jingshah thngan ha kaba iadei bad ka jingiakhun ban pynbha ia katei ka surok khamtam haba nga la dep ban pynshai ia ka jinglong jingman,” bynrap u Symbud Myntri Rangbah.