Kyntu shimkhia ka KSU ia ka NEIGRIHMS halor ki 10 tylli ki mat jingdawa ha ka thungkam thungjam

Syllad | The Rising MeghalayaApril 2, 2025

Ka Khasi Students Union (KSU) ha ka 1 tarik Iaiong ka la aiti ia ki shiphew tylli ki mat jingdawa ban pynthikna ba ki hok jong ki trai shnong riewlum kim dei ban shah knieh ha ka jingthungkam thungjam hapoh ka North Eastern Indira Gandhi Regional Institute of Health and Medical Sciences (NEIGRIHMS).

Ha ka shithi sha u Director ka NEIGRIHMS, u Chairman ka KSU Employment Cell u Reuben Najiar u la ong, “Ka seng ka kyrpad da ka jingsngew rit ban shimkhia mardor halor kane ka bynta ban pynbeit bad ban shim ia ki sienjam ban pynthikna ba ki hok jong ki trai shnong riewlum ka jylla ym dei ban pynkhein bad ruh ban pynneh ia ka kyrdan jong ka jingai jingsumar hapoh NEIGRIHMS kaba la hiar namar ka rukom thep kam kaba la dep ha kaba la pynrung da ki Nurse kiba la tam kyntait.

“Ka seng ka kyrpad ruh ba ia ka jingpynbna lait kam ne Advertisement kaba mynta dei ban weng shwa sharud tad haduh ban da pyndep ban pynbeit ryntih ia kaken ka phang. Kano kano ka jingpyrshang ban leh bym suitniew ia kane ka jingkyrpad na ka liang ka seng kan shim da kiwei pa ki sienjam kiba tyngeh,” u la maham.

Haba kyntu ia ka Institute ba kan shimkhia halor kitei ki 10 tylli ki mat jingdawa, ka KSU ka la ong ba ia ka jingbuh kyndon kaba iadei bad ka rta dei ban pynneh haduh 35 snem rta ha ka jaka jong ka 30 snem rta, kaba dei ka jingpynjlan na ka bynta kiba hap hapoh ka reserved category.

“Da kaba pynshong nongrim katkum na ka Advertisement la iohi ba ka rta na ka bynta ka kam nursing officer lem bad kiwei pat ki post la pynhiar noh sha ka 30 snem rta, bad ia ka rta na ka bynta ka Pharmacist la pynhiar sha ka 27 snem rta. Ha ka jingpynrung kam ha ki snem ba la dep ka jingbuh kyndon ia ka rta ka long 35 snem rta, hynrei kynsan la pynhiar sha ka 30 snem rta kaba la ktah jur ia ki samla kiba don ka jingangnud. Ka jingshim rai da ki bor ba dei khmih halor kane ka bynta ka long kaba bakla shibun bad ka bym don jingmut namar ka jingbuh kyndon da ka rta kaba rit kan ktah jur ia ka rukom treikam baroh kawei, kan ktah ia ka ioh ka kot, kan pynduna ia ka jingshemphang bad jingtbit jong ki nongtrei kaba long kaba kongsan bha halor ki rukom treikam ba janai ha ka liang ki lad aijingsumar,” ong u Najiar da kaba bynrap, “Ka jingpynkylla ia ki kyndon jong ka Recruitment Rule ban pynrit ia ka rta sha ka 30 snem dei ban pynduh pyndam noh bad ban pynneh biang ia kaba ju long kata 35 snem rta ha ryngkat kiwei pat ki jingpynjlan na ka byna ki reserved category.”

Haba banjur halor ka jingdonkam ban pynneh ia ka ratio kaba long 20:80 hapdeng ki shynrang bad kynthei na ka bynta ka kam nursing officer, u Najiar u la ong ba ka jingthep kam na ka bynta ka nursing officer kaba la leh ha u snem 2023 lyngba ka NORCET ka dei ka jingbakla kaba khraw da ki bor pyniaid ka NEIGRIHMS. Ha u snem 2023 la iohi ba 194 ngut kiba la shah jied haduh 175 ngut na ki, ki dei ki Nurse Shynrang bad tang 19 ngut ki Nurse kynthei kiba la shah jied. Kine ki 175 ngut ki Nurse shynrang ki dei kiba la tam kyntait bad ki bym shym la shah jied ha kiwei pat ki jaka sumar bad ia kiba la pynrung ha NEIGRIHMS, kata namar ba ki bor pyniaid kim dei kiba iohi jngai ban pynbiang ia ka jingbha na ka bynta ki shynrang bad kynthei kaba long 20:80.

“Ka jingpynrung kam na ka bynta ka Nursing Officer ha utei u snem ka dei kaba la leh da ka NORCET, hynrei ka AIIMS ka don ia ka ratio kaba 20:80 hapdeng ki shynrang bad kynthei, kaba pynlong ia ki ba kin ioh ban bat ia ki candidate kiba bha tam. Kitei ki Nurse shynrang kham bun ki dei napoh Rajasthan bad ki dei ki bym don satia kano kano ka jingshemphang bad kiba long pynban ka jingthud ia ka jingai jingshakri ha ka liang ka koit ka khiah. Ki la don ruh shibun ki jingujor ba ka seng ka la ioh pdiang pyrshah ia kine ki Nurse shynrang ki bym larkam bad kiba long ruh ka jingma ia ka jngim jong ki nongpangLada kiwei ki jaka sumar ki lah ban don ia ka bha kaba 20:80, kumta kaei kaba khanglad ia ka NEIGRIHMS ba kan pyntreikam ia kane kajuh ka sienjam” ula bynrap.

Ha kajuh ka por ka KSU ka la dawa ruh ba ka jingpan ia ki experience certificate tang na ki hospital kiba 50 jingthiah dei ban weng noh, hynrei dei ban pdiang tang ia ki experience certificates na ki hospital kiba la ioh ia ka jingithuh, ka jingpynrung kam ka dei ban long lyngba ka offline mode (OMR), ban khmih bniah ia ka Roster register bad ban pynbit pynbiang katkum ka jingbhah ba dei ban bhah bad ka dei ban don ruh ia ka jingkdew shai ia ka ‘backlog vacancy’ bad sa katno snem ka dang sah ban pynrung kam na ka bynta ki kam kiba lait thylli ki bym pat dep thung bad kumta dei ban ym bhah shuh bad ban mang noh shawei pat.

Nalor kata ka KSU ka la dawa ruh ba dei ban pynduh noh ia ka bhah jong ki OBC ha ka Group B &C namar ha Meghalaya kam don satia ka thup OBC, ka bhah ia ki Schedule Caste  ha ka Group B dei ban khate noh da 1% kumba la bhah ha ka Group C da kaba pynshong nongrim katkum ka jingbun briew, ka bhah OBC kaba 27% ha ka Group B bad 5% ha ka Group C dei ban pynphai noh sha ki Schedule Tribe jong ka jylla Meghalaya Khasi/ Jaintia/ Garo) bad ba ka jingpynrung kam ha u snem ba la dep ruh ka donkam ban bishar bniah da kaba pynshong nongrim halor ki daw kumba la kdew haneng bad ban shim mardor ia ki sienjam.