Kyntu tuklar ka KSU ia u Myntri ka Tnat pule puthi ba khot pynlong eksam CSIR NET

Syllad | The Rising MeghalayaDecember 22, 2023

Ka Khasi Students’ Union (KSU) haka 21 tarik Nohprah ka la kyntu ia ka jingtuklar lem ba mardor jong u Myntri ka Tnat pule puthi u Rakkam A Sangma ban pynbeit mardor ha kaba iadei bad ka jaka pynlong eksam na ka bynta ka CSIR NET.

Ha ka shithi sha u Sangma, u Chairman ka KSU Education Cell u Samla Pynkmenlang Sanmiet u la ong, “Ka Seng ka kyrpad ia ka jingtuklar lem ba mardor halor kane ka bynta bad ban pyndonkam ia ka iktiar ban ia pynbeit bad ki bor kiba dei khmih bad ban kyntu ia ki ba kin pynbeit ha kaba iadei bad ki jaka pynlong ia ki eksam (da ka National Testing Agency (NTA) na ka bynta ka CSIR NET namar kane kan sdang naduh ka 26-28 tarik Nohprah 2023. Kane ka jingpynbeit ka long kaba donkam khnang ban pynthikna ba ka jingangnud jong kiba bun ki samla pule postgraduate na kane ka jylla kin ym shah pynthut bad mad jingeh namar kane ka jingleh.”

U la ong ba bun na ki samla pule na ka jylla Meghalaya ki la hap ban leit thoh ia ki eksam jong ki shapoh Jorhat bad Dibrugarh, kata wat hadien ba la jied ia kine ki jaka ne centre kum ka jingjied kaba lai bad ba saw jong ki.

“Kane ka jingiai bteng ban pynhap da ka NTA ia ki jaka thoh eksam ka wanrah ka jingeh kaba khraw ia ki nong aplai, kata khamtam ia kito kiba wan na ki longiing kiba kham duna ha ka liang ka ioh ka kot. Lah ruh ban kdew ba ka jylla Meghalaya ka biang ha ka jingdon ia ki testing centre,” ong u samla Sanmiet.

Da kaba pynpaw ba ka jingpynlong ia ka UGC NET (University Grants Commission National Eligibility Test) kaba dang shu kut shen kum ka sienjam kaba jop ha ka jingpynbiang ia ki nongialeh eksam ha ka jylla, une u nongialam ka Seng u la ong; “Ka long kaba sngewkhia ba ka jingpynhap ia ki jaka thoh eksam na ka bynta ka CSIR NET ka la iaid lait na ki kyndon ba la buh beit da ka UGC NET.”