Kyntu tuklar ka Santa Mary Shylla ia u CM halor ka jingsniew ka surok bah National Highway 6

Syllad | The Rising MeghalayaJuly 31, 2023

Ka MLA ka Sutnga Saipung, ka Kong Santa Mary Shylla, mynta ka sngi ka la phah da ka jingthoh sha u Myntri Rangbah ka jylla u Conrad K Sangma ban tuklar lem ha kaba iadei bad ka jingsniew jong ka surok NH6 na Mynkren sha ka shnong Malidor ha East Jaintia Hills.

Na ka liang ka MLA lyngba une u kyrwoh ka la pynpaw ka jingsngewkhia kaba jur ha kaba iadei bad kane ka rukom pyntrei ia kane ka surok lyngba ka NHAI, bad pynpaw ruh halor ka jingkhih bitar jong ki paidbah halor kane ka jinglong jingman.

Halor kane ka jinglong jingman ka MLA ka la khot ruh na ka bynta ban pyntrei thymmai ban siang rong ia kane ka surok kaba la julor palat pud bad kaba la wanrah ka jingeh kaba khraw ia ki paidbah nongleit nongwan.

Nalor kata kum ka nongmihkhmat ka thain ka la leit ruh ban iakynduh ia u Symbud Myntri Rangbah ka jylla u Bah Prestone Tynsong ban kyntu ban tuklar lem ha kaba iadei bad kane ka phang.Halor kane ka bynta ka la ong ba na ka liang une u Myntri u la khot ia ka jingialang bad ki heh ophisar ka NHAI ban iamir jingmut halor kane ka mat ha ka 2 tarik u Nailar 2023.

Ha kajuh ka por na ka liang ka MLA ka la kyntu ruh ia u CM ka jylla kumjuh ia ka Myntri ka tnat ka koit ka khiah ka Kong Ampareen Lyngdoh na ka bynta ban kyntiew kyrdan noh ia ka Umkiang PHC sha ka CHC, kumjuh ban plie ia ka PHC ha Sumer Sirdarship bad ia ka health sub centre hapoh ka shnong Hingaria.