Kyntu tuklar u Bah Sanbor ia u CM ka Assam ba byrthen khang pynpoi mar ka ka AAUMTA sha Meghalaya

Syllad | The Rising MeghalayaSeptember 22, 2024

U MLA ka BJP na South Shillong Bah u Sanbor Shullai ha ka 21 tarik Nailur u la kyntu ia u Myntri Rangbah ka Assam uba dei ruh u Convener ka NEDA u Himanta Biswa Sarma ban shim da ka suo moto case halor ka jingbyrthen jong ka Seng All Assam United Motor Transport Association (AAUMTA) ban khang pynpoi ia baroh ki jait mar ki mata ba kongsan kynthup ia ki mar bam sha Meghalaya.

U Bah Sanbor u la pynpaw da kaba ong, “Ka jingbyrthen ba dang shen jong ka AAUMTA ban khang ia ka jingpynpoi ia baroh ki jait mar kynthup ia ki mar bam sha Meghalaya ka dei kaba hap ban pyrshah jur bad kaba dei ban pynrem tyngeh. Kaba kum kane ka sienjam ka long pyrshah ia ka jingiadei ba iajan kaba la neh da ki spah snem hapdeng ki briew ki jong ngi, ka pynkhein ruh ia ka mynsiem jong ka jingialong shipara hapdeng ki jylla ka thain Shatei Lammihngi,” u la ong.

Lah ban kdew ba kane ka jingbyrngem jong ka AAMUTA ka la wan long ruh hadien ba ka  All Khasi Meghalaya Tourist Taxi Association (AKMTTA) kala dawa ia ka Sorkar Jylla ban khang noh ia baroh ki kali Tourist ba nabar Jylla khamtam na Assam, ba kin wan kamai bad kit ia ki nongshangkai pyrthei sha ki jaka jngohkai kiba don hapoh ka Jylla.

U ong ruh ba ia kum kine ki kam dei ban ia pynbeit da ka jingiasngewthuh jingmut hapdeng ki ar seng, u la ong ruh ba dei ban shim nuksa na kiwei pat ki jylla kum ka Sikkim bad ka Darjeeling ha West Bengal, ha kaba ki kynhun na baroh ki ar Jylla ki la mynjur halor ki katto katne ki kyndon treikam kiba iahap.

Nalor kata u Bah Sanbor u la ong ba ki jingsngewkhia ba la wanrah da ka AKMTTA ka long kaba shongnia, hynrei ka dei pat ia ka ban hap ia pynbeit bad katei ka Seng na Assam. U la ong ba baroh ar liang ki dei ban poi sha ka jingiasngewthuh jingmut na ka bynta ka jingmyntoi jong ki riew paidbah bad ki nongshangkai pyrthei kumjuh.

“Ngi kum ki kynhun kiba ia don bynta ha Meghalaya ngi donkam ban wanrah ia ki sienjam da kaba pynbiang ia ki jingdonkam ba kham jem, ki jingdonkam ba kham biang bad ka jingiajan bad ialong paralok khnang ba ki nongwan shangkai kiba wan na shabar ka Jylla kin sngew shngain, kin sngewtynnad haba ki sah ha Meghalaya bad ban jied ia ki kali tourist jong ki trai shnong. Baroh ki seng niah tourist Taxi ka jylla lem bad kiwei pat ki kynhun kiba don bynta ki dei ban iamir jingmut lang halor ki lad ki lynti ban kyntiew ia ka kam jngohkai pyrthei,,” u la bynrap.

Ha kajuh ka por u la pyntip ruh ba ka sorkar Jylla hapoh ka jingialam u Myntri Rangbah u Conrad K Sangma ka la shim ia bun ki lah ki lynti ban kyntiew ia ki kam jngohkai pyrthei, hynrei ngi donkam ban shim ia kane ka lad ka kabu bad ban pyniad ia ka rukom kaba dei.

Shuh shuh u la ong ba ka kam jngohkai ha Meghalaya ka lah ban kynjoh sha ka thong kaba halor eh ha kine ki shiphew snem ki ban wan lyngba ki sienjam ba la shim da ka sorkar MDA ban kyntiew ia ka jinglah ka jong ngi ban pdiang ia ki nongwan shangkai pyrthei ka ban kot shaduh ka 50 lak ha ka shi snem.

“Kumta ka dei ka jingmyntoi lang na ka bynta baroh ki ar jylla bad ia kaba dei ban iakren ia pynbeit hapdeng ki Tourist Taxi Association na Assam bad Meghalaya khnang ba kan lah ban pynmyntoi ia ka thain hi baroh kaei,” u la ong.