Kyntu u Bah Charles ïa ka sorkar ban pynsangeh iaki jingshah thombor ki Khristan

Syllad | The Rising MeghalayaFebruary 23, 2024

U Bah Charles Pyngrope MLA ka TMC haka 22 tarik Rymphang, ula kyntu iaka sorkar ban shim iaka sienjam ban pynangeh mardor iaka jingshah kren tohmet bad shah pyndik ki Khristan.

Haba wanrah iaka zero hour, u Bah Charles ula pyntip ba kane ka jingdawa kala jia long hadien ba kawei ka riew niam ka Sister Rose Mary na Siju, South Garo Hils kala shah kren bein bad shah pynhiar na kawei ka bus Assam katba dang iaid lynti na Duhnoi sha Goalpara kaba jia dangshen.

Kane ka jingjia kala ktah jur iaka bor pyrkhat bad wanrah ka jingbym sngew shngain.

“Ka jingshah pyndik ki briew tang namar ba ki riam da ki jingriam niam ka dei ka bym lah ban pdiang bad ka bym ju iohsngew…Kum kine ki jingjia ki mih namar ka jingialam bakla kren bein niam bad pyrshah niam Khristan,” ula ong u bah Charles bad kyrpad iaka sorkar ban shim iaki sienjam ban leh eiei bad ong ruh “Nga sngew ba ka sorkar ka la dei ban shim ki sienjam ban tehlakam kum kine ki jingjia”.

Haba jubab na ka liang u Myntri Rangbah ka jylla u Conrad K Sangma u la ong ba hadien ba u la ïoh jingtip shaphang kane ka jingjia, u la shimkhia ban ïakren bad u Myntri Rangbah ka jylla Assam u Himanta Biswa Sarma.

U la ong ruh ba ka jingtip kaba u ïoh kam pat biang satia ban ïaid daka bor sorkar.

“Ngi dang ap ka jingtip kaba thikna kumba ka long mynta ngi dang tip tang ka tarik bad ka por bad ka jaka ba ka leit, ngim pat ïoh satia ka number jong ka bus ne kiwei pat ki jingtip kiba lah ban ithuh kito ki briew kiba donkti”, u la ong u CM.

U la kular pat ban un ïai pyrshang ban pynthikna ba kum kini ki jingjia kan ym jia ha kano kano ka jaka hapoh ka ri.

U Sangma u la ong ruh ba un phah ka jubab da ka jingthoh ha kaba ïadei bad kane ka kam hadien ba la ïoh jingtip kaba thikna.