Kyntu u bah John Kharshiing ia ki nongialam ka powerlifting bad weightlifting ban wan lang ha ka juh ka kynhun

Syllad | The Rising MeghalayaDecember 12, 2021

U Working President ka Meghalaya State Olympic Association, u bah John F Kharshiing, u la wan shakhmat ban kyntu iaki nongialam jong ka synjuk Powerlifting bad kumjuh ka Weightlifting & Fitness Association of Meghalaya ba kin wan lang noh ha ka juh ka lama, khnang ba kan long ka jingmyntoi ia kiba bun ki khun samla ba don ka sap ha ka iakob ialehkai rah nar khia.

U bah John u la pynpaw ia kane, hadien ba na ka liang ka Powerlifting Association of Meghalaya ha kane sngi Thohdieng, ka la pynlong ia ka jingialang ban pynkup burom ia la ki nongialehkai kiba dang shen ki la ioh ba kin khur ia la ki nam jop ki jong ki na ka rynsan iakhun jong ka national ba la long ha Goa.

Ia ka jingialang la pyniaid ia ka da u bah Riki Diengdoh bad ba la ioh ruh ia ka jingkren na u secretary ka synjuk u bah D Frankie Nongrum nangta u Dip Jyoti,bad hadien kane la pynbud da ka jingsam ia ki syrnot sha ki nongjop bd kumjuh sha ki nongwan iashim bynta sha katei ka jingiakob ba la long ha Goa.

Shuh shuh u Bah John u la ioh ruh ia ka lad ban batai ne ban sngewthuh ba haduh katno ka jingmyntoi lada ki khun samla kynthei ne shynrang kin ialeh ban phai khmat sha ki jingialehkai ba tip kum ki Olympic discipline, namar dei tang kine ki jingialehkai, ba ka lad jingiarap ne ki song pisa iarap, ki long lypa kiba la pynkhreh da ka sorkar jylla, kaba la dep ban pruid dak bad ruh ban pyntreikam ia ka ‘sports policy’ ha kane ka jylla.