Kyntu u Bah Pala ia ki nongkyrshan jong kiwei ki party sain hima ban vote ia ka Congress

Syllad | The Rising MeghalayaMarch 19, 2024

U MP ka Seng Congress na Shillong u Bah Vincent H Pala u la kyntu ia ki paidbah nongkyrshan jong kiwei pat ki party sain hima ba kin vote ia ka Seng Congress ha kane ka ilekshon Lok Sabha ka ban long ha ka 19 tarik u Iaiong u ban wan.

Haba kren ha ka jingialap ilekshon ha ki thain khappud ha Malangkona bad Athiabari ha West Khasi Hills ha ka 16 tarik mynta u bnai, u Bah Pala u la ong, “Kam lei lei lada phi don bad kino kino ki party sain hima, kata la ka long ka NPP, TMC, UDP lane VPP, to ngin iatylli lang kawei ban ai jingkyrshan ia ka Congress namar hapoh Delhi kan dei tang ka Congress ne BJP ki ban thaw ia ka sorkar ka ban wan.”

U la ong ruh ba lada ka seng Congress ka khlain, ki paidbah nongshong shnong bad ka jaidbynriew hi kin khlain bad ioh bor.

Haba kdew ba ka synshar khadar ka la noh shiliang kumba ka long mynta, une u MP ka Congress u la ong, “Kiba riewspah ki la nang riewspah bad kiba duk ki la nang duk tasam.Ki briew kiba don ha ka bor ki la nang riewspah.

Nalor kata u la ong ruh ba ka dor ka mur jong u kwai ka la hiar arsut namar ki la ailad ia ki briew kiba shalan kwai ba kin wan na shabar. Dei na kata ka daw lada phi shalan ei ei lyngba ki lynti surok kin dawa pisa namar kino kino kiba iaid katkum ka ain kin shah pynthut, hynrei kino kino kiba iaid da kaba beain haba ki siew kin pynlong kaba shong ain. Kumta ka sorkar ha Meghalaya ka dei kaba shah liang bad suki suki kane kan sa wanrah ka jingeh kaba khraw ia ka jylla bad ki khun samla.

Shuh shuh u Bah Pala u la ong ruh ba ki MP ki dei ki nongthaw ia ki polisi..”Kino kino ki polisi ba l shna hapoh Delhi, ki Jylla kin hap ban pyntreikam ia ka. Lada ka Delhi ka wan da ka polisi na ka bynta ki Hindu, ki Hindu kin kmen, lada ka dei ka polisi na ka bynta ki Khristan ki paid Khristan kin kmen, lada dei ka polisi ia ki nongkhaii, ki ruh kin kmen, hynrei kane kam long kumta ka synshar khadar ha India ka dei ban long  kum ka riti synshar ka Ri ne Constitution.

Hynrei, u la ong ba ka polisi jong ka seng Congress ka long ban kyntiew ia ka kamai kajih jong u duk u suk bad kiba riewspah kin iarap ban siew khajna ban iarap ia kiba duk bad ruh ban plielad ha ka liang ka ioh kam ioh jam ia baroh.Kane ka dei ka jingiapher hapdeng ka Congress bad ka BJP.