Kyntu u Bah Pala ia u Saleng ban siew kylliang ia ka jingleh ka BJP ia ka Congress ha Garo Hills

Syllad | The Rising MeghalayaJuly 7, 2024

U nongialam ka Congress uba dei ruh u MP barim ka Shillong u Bah Vincent H Pala ha ka 6 tarik mynta Naitung u la panmap namar ka jingshah rem ha kane ka elekshon Lok Sabha kaba dang shu dep shen da kaba kyntu ruh ia u MP thymmai na Tura u Saleng A Sangma ban siew kylliang ia kaei kaba ka BJP bad ki paralok jong ka ki la leh na ka bynta ka seng Congress ha Garo Hills.

Haba kren ha ka prokram leh burom ia u Saleng halor ka jingjop don burom jong u na Garo Hills, u Bah Pala u la ong “Nga ruh nga ieng hangne ​​ban ong sngewbha map namar nga la shah rem ha kane ka elekshon. Nga shim ia ka jingkitkhlieh kaba pura halor kane ka jingshah rem.”

Da kaba pynpaw ba ka jingshah rem ka dei u mawjam sha ka jingjop, une u MP barim u la ong, “Baroh hangne, la ka long u Bah Ronnie V Lyngdoh, u Gabriel Wahlang, la ka dei ka Deborah Marak, u Pynshngain N Syiem ha kawei ka por ngi la jop bad ngi la rem ha ka elekshon hynrei ngim ju duh jingkyrmen, ngin trei shitom,” u la ong.

Da kaba pynpaw ba ka jingjop jong u Saleng ha Garo Hills ka la pynkylla ia jinglong jingman jong ka saiñ hima sima ha Meghalaya, u Bah Pala u la ong, “Nga kynmaw ha ka por ba nga shimti nyngkong ia ka kam kum u president la jan shisnem ngi la mad shibun ki jingeh. Ki briew ki ong ba ka Congress ka dei ka lieng kaba ngam jyllop bad ba ym lah ban pynim pat…Da ki spah ngut ki paralok jong nga ha ka Youth Congress hapoh ka MPCC ki la iehnoh ia ka Congress bad ki la iasoh sha ka liang ban kham bit bang biang haka sain pyrthei hynrei mynta da ka jingjop jong u Saleng na Garo Hills, ka jinglong jingman jong ka sain pyrthei ha Meghalaya ka la kylla.”

Nalor kata u la ong ruh ba saw bnai shwa ka elekshon, ki la khroh ia ki paidbah ban rung sha ka Congress, hynrei kine ki briew ki la rkhie bein ia ngi, hynrei mynta kine ki juh ki briew ki la kyrpad ban wanphai biang sha ngi. “Ka daw hi ka long ba bun ki briew bad ki party ki iakhun ia ki elekshon na ka bynta ki jingmyntoi shibun, na ka bynta ka jingmyntoi ha ki kam business, ban shakri tang ia kawei ka niam kaba ki don, ban shakri tang ia kawei ka jaidbynriew, ban shakri tang ia ki jaka bad ki constituency la jong,” u la ong.

“Katba, ka Congress kam dei tang na ka bynta ka jingmyntoi jong ki paidbah hynrei ka dei ka sain pyrkhat kaba la pynlong ia ngi ban sngew sarong, ka jingiada ia ki rit paid, ka jingiada ia baroh ki jait jingngeit bad ki niam, ka jingiada ia baroh ki bynta jong ki briew katkum ka riti synshar bad kaba la la wanrah biang ïa ka Congress bad ka Congress kan neh beit Phi lah ban lehbeiñ ne kynnoh ïa uno uno u nongïalam hynrei ka Congress kan neh beit,” bynrap shuh shuh u Bah Pala.

Ha kajuh ka por une u nongialam ka Congress u la ther tyngeh ia ka BJP bad ia ki paralok jong ka, ka National People’s Party (NPP) bad ka United Democratic Party (UDP) halor ka jingpynkylla sohpdung ia ka seng Congress bad ong ba ka la dei eh ka por ia u Saleng ba un siew kylliang ia kaei kaba ki la leh ia ka party hapoh Garo Hills.

Ka Congress ka dei ban jop iaka elekshon shiteng samoi na Gambegre: Pala

Une u heh ka seng Congress la ong ba ka elekshon shiteng samoi ban wan sha ka shuki iing dorbar ka Gambegre ka dei ka elekshon kaba ‘dei ban jop’ ia ka party.

Haba ïakren bad ki nongthoh khubor, u bah Pala u la ong ba ka party ka la khot aplikeshon na ki briew kiba angnud ban long kyrtong bad ka la rai ban aiti ha u MP ka Tura u Saleng A Sangma uba dei u nongthaw ain barim jong ka Gambegre ban pynthikna ia ka jingjop ia ka party ha kane ka bye-poll kaban sa long shen.

“Ngin shaniah ha u MP jong ngi ban pynlong ia u kyrtong jong ngi ban jop bad thikna ba un ong iano ngin ai tiket bad thikna ba ngin ai ka jingkyrshan,” u la ong.

Haba pynpaw ba kane ka dei ka elekshon kaba dei ban jop ïa ka Congress, u Bah Pala u la ong ba u Saleng u hap ban jop ha kane ka elekshon namar ba u Myntri Rangbah ka Jylla u Conrad K Sangma u pynieng ïa ka kurim jong u na ka NPP, u Myntri Rangbah barim u Mukul Sangma un pynieng iaka kurim jong u Zenith na ka TMC.

“Kumta ka dei kawei na ki elekshon kaba sngewtynnad tam ha Garo Hills ha kane ka kynti namar baroh ki nongialam kiba heh, kynthup ia u myntri rangbah, myntri rangbah barim bad myntri rangbah u ban wan kin iakhun ha kane ka kynti,” u la ong.