Kyntu u Bah Prestone ban husiar ia ki party ba kam ieid jaidbynriew bad ialam bakla

Syllad | The Rising MeghalayaFebruary 19, 2025

U President ka National People’s Party (NPP) Meghalaya bad Symbud Myntri Rangbah ka Jylla, u Bah Prestone Tynsong haka 19 tarik Rymphang u la kyntu ia ki paidbah ba kin long kiba husiar bad kyntait mardor ia ki party sain pyrthei kiba kam ieid jaidbynriew da kaba pyrshang ban ialam bakla ia u paidbah

Ia kane u la pynpaw haba kren ha ka jingialang ialap elekshon ha Pohkseh ban pan jingkyshan ia u Chief Executive Member (CEM) ba mynta ka KHADC u Bah Pyniaid Sing Syiem u ban iakhun na ka NPP napoh Nonthymmai constituency ha kane ka elekshon ka ban long ha ka 21 tarik Rymphang. 

U Bah Prestone u kyntu ruh ia ki paidbah ba kin long kiba husiar bad ban ym shah ialam bakla ha ki seng sain pyrthei kiba pyrshang ban pynsaphriang ia ki khubor bym shisha bad ialam bakla ha ka kyrteng ieid jaidbynriew bad ialam bakla khamtam ia ki samla.

Haba pynpaw ba ka elekshon ADC ka dei kaba kongsan bha, une u  nongialam ka NPP u la ong, “Ngi kwah ia ka NPP ba kan thaw ia ka Executive Committee kaba thymmai namar ka la ialam ruh ia ka Sorkar Jylla, bad ka long kaba donkam ba baroh ar kin iatreilang na ka bynta ka bha ka miat jong ki paidbah bad na ka bynta ka roi ka par jong ka Jylla.

Haba kyntu ia ki paidbah ka Nongthymmai constituency ba kin ai ka jingkyrshan kaba pura ia u Bah Pyniaid Sing Syiem, u Bah Tynsong u la ong, “U Bah Pyniaid u dei u mawkordor jong ka jaidbynriew. Phi long kiba donbok ba u long uba kloi ban pyndem ia lade ha ka sur jong ki paidbah bad ban mynjur ban iakhun na ka constituency kaba bun ki riew shemphang.Kumta nga kyrpad ia phi ban ai ka jingkyrshan kaba pura ia u namar u dei uba biang tam napdeng baroh ki kyrtong.”

“Hapoh ka jingialam ka jong u Bah Pyniaid, ka KHADC ka la lah ban mynjur ia kiba buntylli ki Bills kiba kongsan kiba mynta ki la long Ain hadien ba la ioh ia ka jingmynjur na u Lat ka Jylla na ka bynta ban iada ia ki trai ri trai muluk,” u la bynrap.

Nalor kata u Bah Prestone u pynkynmaw ruh ba hapoh ka jingsynshar jong ka NPP  ka Sorkar dang shen kala buh ia u maw nongrim ban tei ia ka Secretariat kaba thymmai ha New Shillong ha ka jinglut ka ban kot kumba T.1200 klur bad ka ban iarap shibun ban pynduna ia ka jingkhapngiah ka sor Shillong.