Kyntu u Bah Prestone ban vote ia ka NPP namar ka jingpynthikna ban pyllait ia ka CAA na Meghalaya

Syllad | The Rising MeghalayaApril 12, 2024

U State President ka National People’s Party (NPP) uba dei ruh u Symbud Mynri Rangbah ka Jylla u Bah Prestone Tynsong u la kyntu ia ki paidbah ba kin vote ia kane ka party kaba la pynthikna ban pyllait ia ki jaka kiba hap hapoh ka Sixth Schedule ha Meghalaya na ka jingtreikam jong ka ain Citizenship Amendment Act (CAA).

“Balei ngi kyntu ia ki paidbah ba kin kyrshan ia ki kyrtong ki jong ngi namar ba ngi la lah ban pynthikna ba ki jaka kiba hap hapoh ka Sixth Schedule ha ka Jylla kin lait na ka jingtreikam jong ka CAA,” ong u Bah Tynsong haba kren ha ka jingialap ilekshon ha Iawpynsin, Wahiajer, West Jaintia Hills ha ka 11 tarik mynta u bnai.

Nalor kata u kyntu ruh ia ki paidbah ba ki dei ban kyntait ia ki jingkynnoh pyrshah ia ka NPP. “Ki paidbah kim lah ban kynnoh ia ka NPP ha kaba iadei bad ka roi ka par, hynrei la kumno kumno ki la ioh ban kynnoh ia ngi da kaba ong ba ka BJP bad ka NPP ki dei ki juh,” u la ong.

U Tynsong u pynkynmaw ruh ba ha ka por ba wanrah ia ka Citizenship Amendment Bill (CAB) da ka BJP hapoh parliament, baroh ki party sain hima, ki Sengbhalang bad ki paidbah ki ieng pyrshah ia kane.

“Ha u snem 2019, dei u Conrad K Sangma kum u Myntri Rangbah uba la khot pynlong ia ka jingialang jong baroh ki party sain pyrthei na Meghalaya bad kiwei pat ki jylla ka thain North East ha kaba la shim ruh ia ka rai ba u Conrad un buh sngi ban iakynduh ia u Myntri Rangbahduh ka ri bad ia u Myntri kam pohiing ka sorkar pdeng u Amit Shah hapoh Delhi. Kumta ruh, ngi la iakynduh ia u PM bad u Myntri kam pohiing bad aiti ia ka memorandum pyrshah ia ka CAB,” ong u Bah Prestone.

“Hadien ba la wanphai na Delhi, ngi la iakynduh biang ha Meghalaya bad shim ia ka rai ba u CM u dei ban iakynduh biang ia u PM bad ia u Amit Shah, bad ngi la iakynduh ia u Myntri kam pohiing hashwa ban mynjur ia ka CAB hapoh parliament. Ha kane ka por na ka liang u Myntri ka sorkar pdeng u la pynthikna ha ngi ba yn pyllait ia ka jingtreikam jong ka CAB ha Meghalaya,” u la bynrap shuh shuh.

Nalor kata u Bah Tynsong u la pynthikna ruh ba ka MP ka NPP na Tura ka Agatha Sangma ka la aijingkyrshan ia ka CAB halor ka nongrim ba ka sorkar India ka la mynjur ban pyllait ia ka Meghalaya kaba don laitylli ki autonomous district council.

Hynrei, ka long kaba sngew bynniaw ba ki paidbah ki la pynrem ia ka (Agatha) bad ong ba ka BJP ka dei ka NPP bad ka NPP ka dei ka BJP, hynrei Ngan ong ha phi kane kam long kaba shisha, hynrei ngi iatreilang hapoh ka sorkar NDA ha ka sorkar pdeng, ong u bah Tynsong.