Kyntu u Bah Prestone ban ym ngeit ia ki jingkynnoh ba ka NPP ka dei ka BJP 

Syllad | The Rising MeghalayaMarch 26, 2024

U State President ka National People’s Party (NPP) uba dei ruh u Symbud Myntri Rangbah ka Jylla u Bah Prestone Tynsong haka 25 tarik Lber, u la kyntu ia ki paidbah ka Jylla ba kin kyntait ia ki jingkynnoh ba la kynnoh da ki party  ba ka NPP bad ka BJP ki dei ki juh.

“Ki jingkynnoh ba ka NPP ka dei ka BJP bad ka BJP ka dei ka NPP ka long ka bym lah pdiang satia. Kiba kum kine ki jingkynnoh ki ju mih tang shisien san snem, kata ha ka por ba pynlong ia ka ilekshon MP, MLA bad MDC. Kumta Nga kyntu ia ki paidbah nongthep vote ba kim dei satia ban ngeit ia kiba kum kine ki jingkynnoh kiba wan tang ha ka por ilekshon,” ong u Bah Tynsong sha ki lad pathai khubor.

Ia kane u Bah Prestone u la pynpaw halor ki jingkynnoh kiba la mih hadien ka jingshim rai jong ka BJP ban ai ka jingkyrshan kaba pura ia ki kyrtong jong ka Seng NPP napoh Shillong bad Tura parliamentary seat ha kane ka Lok Sabha ilekshon ka ban long ha ka 19 tarik u Iaiong u ban wan.

U Bah Tynsong u pynkynmaw ba ha u snem 2018, kiba kum kine ki juh ki jingkynnoh ki la mih, kata da kaba ong ba ki paidbah kim dei ban vote ia ka NPP namar ka NPP ka dei ka BJP bad lada ki jop ia ka ilekshon ki lah ruh ban khangdam noh ia ki iingmane bad ban knieh noh ia ka jinglaitluid jong ki paidbah ha ka jingngeit niam.

“Kane ka dei ka jingkynnoh kaba la jia ha katei ka por. Hynrei U Blei u long uba khraw namar hadien ba ngi la jop ngi la thaw ia ka sorkar naduh u 2018 haduh u 2023. Nga kwah ban buh jingkylli ia kito kiba pynmih ia kine ki jingkynnoh ba la ka don ne em kata ka jingpyrkhing ne ka jingkhanglad ia ki briew ha ka jingmane Blei lyngba ka sorkar hapoh ka jingialam ka NPP. Ka NPP hi ka kut jingmut ban iada ri ki rit paid bad ruh ngi kwah ban iada ia ka jinglong kyrpang jong ki paid riewlum jong ka thain North East bad ka India hi baroh kawei,” u la ong.

Nalor kata u Bah Prestone u la ong ruh ba ka BJP ka la ai ka jingkyrshan ia ka NPP khlem ka jingbuh satia ia kino kino ki kyndon. “Nga la iohi ia ki jingkynnoh kiba la mih biang mynta kiba ong mynta la thikna ba ka NPP ka dei ka BJP bad ka BJP ka dei ka NPP namar na ka liang ki nongialam ba halor ka BJP ki la rai ban kyrshan ia ka NPP na Shillong bad Tura parliamentary constituency. Kum u state president ka NPP Nga kwah ban ong kane, ngi pdiang sngewbha ia ka rai jong ka BJP ban aijingkyrshan ia ki kyrtong ka NPP khlem kano kano ka jingbuh kyndoh,” ong u Bah Tynsong.

“Kum ki nongialam ngi sngew kyndit  namar ngim poi pyrkhat namar ma ki ruh ki la pynkhreh bad khot aplikeshon na ka bynta kito kiba kwah ban iakhun ia kane ka ilekshon napoh Tura bad Shillong.Ngi nang tharai ba ka BJP kan ia aireng khlem artatien. Hynrei ngi ieh ha ka jingstad jong ki.Lehse ki nongialam ka BJP ba halor ki pyrkhat ba kan kham bha ban ai ka jingkyrshan ia ka NPP kaba dei ka kynhun synrop ka NDA,” u la bynrap.

Nalor kata u state president ka NPP u la ong ruh ba ka party jong u ka ai ruh ka jingkyrshan ia kiwei pat ki party sain hima na ka thain North East kiba dei ruh ki paralok synrop ka NDA.

“Ngi ai ruh ka jingkyrshan ia kiwei pat ki party hapoh Manipur bad Nagaland. Kata kam mut tang namar ba ngi kyrshan ia ka NDA, phi ong ba ngi klet noh ia ki kyndon treikam ka party la jong,” ong u Bah Tynsong.