Kyntu u Bah Sanbor ia ka jingtuklar lem u CM ka Assam halor ka kam shalan Masi sha Meghalaya

Syllad | The Rising MeghalayaDecember 12, 2024

U MLA ka BJP na South Shillong, u Bah Sanbor Shullai ha ka 11 tarik Nohprah u la kyntu ia ka jingtuklar lem jong u Myntri Rangbah ka Assam u Himanta Biswa Sarma ban pynthikna ia ka jingiaid beit ka kam khaii Masi sha ka Jylla Meghalaya.

“Ka dei ka jingshisha kaba la tip paidbah ba ka doh masi kadei kawei na ki jingbam ba kongsan jong ki paidbah ka Jylla bad haduh kumba 60% na ka jingdonkam doh masi ha ka jylla la pyndap lyngba ka jingwanrah na kiwei pat ki jylla. Kumta, na ka bynta ki paidbah ka jylla Meghalaya, nga kwah ban kyrpad ia ka jingtuklar lem ka jong phi na ka bynta ka jingiaid beit ha ka kam shalan masi sha Meghalaya na ka bynta ki nongkhaii bad ki kali kiba don ia ki kot ki sla kiba biang lyngba ki bor ba dei khmih ka Jylla,” ong u Bah Sanbor ha ka shithi sha u CM ka Assam.

“Watla katta, baroh ki mat ba la kdew la pynpaw da kaba buh jingmut ia ka rukom bam jong ki paid riewlum ka Meghalaya bad kam don bynta ei ei ruh ha kaba iadei bad ka jingsngew niam jong kano kano ka kynhun jaidbynriew bad ki nongshong shnong hangne kim long pyrshah ia ka jingngneit niam lane ia kano kano ka kynhun jaidbynriew bad ngi burom ia ka kolshor bad ka dustur tynrai jong kiwei pat,” u la ong.

Haba pynpaw ka jingsngewkhia halor ka jingkhasng bam doh masi ha Assam u Bah Sanbor u la ong, “Kumba phi tip ba ka thain Shatei Lammihngi ka kynthup ia ki jaidbynriew riewlum bapher bapher kiba ka rukom bam jong ki ka iadei bad ka kolshor jong ngi bad ngi ki paidbah ngim pyrshah ia kano kano ka niam bad ngim kwah ruh ban ktah ia kano kano ka jingsngew niam.”

“Hynrei, ka jingkhang ba dang shen ia ka jingbam doh masi ha Assam ka la wanrah ka jingkhihwin ha ka jylla jong ngi ha kaba la pynlong ruh da ki seng liang pyrshah ba kan kynnoh ba kane ka jingpynmih hukum ka don ia ka jingthmu kaba sha lyndet jong ka sorkar NDA ban khang ia ka jingbam doh masi ha ka ri baroh kawei.Watla la bteng ban pynshai da ki nongialam napoh Delhi ba ka jingbam ka dei ka sobjek jong ka jylla, hynrei ki kynhun liang pyrshah ki la shim ia ki lynti bymman ban pynphriang ia ki jingtip kiba bakla hapdeng ki trai shnong riewlum ka jylla bad ka thain,” u la bynrap.

U la ong ba ka jingkhang doh masi ha Assam ka la buh jingeh ia ki nongshong shnong ka Meghalaya namar ka jingkiew dor jong ka doh masi namar kane ka jingkhang, kata da kaba phai ruh sha kane ka aiom lehkmen Khristmas bad Snem Thymmai ha ka Jylla.

“Ki nongkhaii masi ba dei hok jong ka thain ki la ujor bun bunsien namar ki jingeh kiba ki iakynduh ha kaba iadei bad ka jingwanrah ia ki masi na kiwei pat ki jylla sha Meghalaya na ka bynta ki kam khaii kiba shonghok, na ka bynta ka rep ka riang bad kiwei pat ki bynta,” pynpaw une u nongialam ka BJP ha ka shithi.

Haba pynpaw ba ka Meghalaya kadei ka jylla ka don ia ka lad pyniasoh lyngba ki surok sha kiwei pat ki jylla tang lyngba ka Assam, u Bah Sanbor u la ong, “Ki trai muluk kham bun ki dei kiba rep ba riang bad ki kam kiba don jingiadei bad kane ka bynta, kata kum ka ri jingri, kum ki masi pynmih dud bad kiwei pat. U la ong ruh ba ka kam khaii masi jong ki trai muluk ki la shah ktah lypa namar ki kyndon 7(1), (i), (ii) bad (7) jong ka Assam cattle preservation act 2021.”