Kyntu u CEO ka Jylla ia ki paidbah ban adkar ban pyndonkam iaki khubor paidbah haka election

Syllad | The Rising MeghalayaJanuary 11, 2023

Satang khyndiat sngi ba ka Election Commission of India kan sa pynkhreh ia ki sngi ki ia ia ka jingpynlong ia ka MLA Election hangne hapoh ka jylla Meghalaya, hynrei na ka liang u Chief Electoral Officer (CEO) jong ka jylla bad ki nongtrei ki jong u, ki la long kiba la pynkhreh ban lah ban pyniaid beit pyniaid ryntih ia kane ka election kaban sa long mynta u snem.

U Bah Frederick Roy Kharkongor (IAS) ba dei u Chief Electoral Officer (CEO) jong ka jylla ula ong ban pyniaid ia kane ka kam ha kane ka jylla, u don bun bah ki jingeh kiba ma u bad ka kynhun ka ban trei, ba kin hap ban mad ne ia kynduh ki jingeh, hynrei kawei na ki jingeh kaba kham jwat bad shem shitom bha ka dei ka jingsaphriang ki khubor bym dei, bym shisha ne ba lamler, kaba na ka por sha ka por lajuh mih paw bha ha katta ka kor ka juk stad ba mynta ba juh ong ha ka ktien phareng Social Media ne ki khubor paidbah.

Halor kane, u bah Frederick u la pynpaw ba kum u khlieh duh ne ka ophis, ka shem ba ka jingpyndonkam ia ka Social Media,l ka hap ban long kaba adkar, ha kaba ki paidbah, kin hap ban thew ban woh ne ban da pynshong nongrim bha ia kaei kaba ki ioh sngew ne iohi ia ki khubor lyngba ka social media, ha ka juh ka por u kyntu bad ban jur ia ki paidbah, ba kin long kiba husiar ne ban nym pdiang ne sha shkor ia kum kine ki khubor hamsaia, pynban bad ngeit ne pdiang tang na ki khubor ba wan lyngba ka shlem treikam ba la ithuh bad kumjuh na ki lad pathai khubor ba don bad ba paw ha ka jylla.

Haba iadei pat bad ka jingsdang ban theh tyngka da ki seng sain pyrthei ha kane ka election, halor kane, u bah Frederick u pynpaw ba kum u khlieh duh un iaid da ka lynti jong ki kyndon ba la pruid dak jong ka Election Commission of India, khamtam lei lei naduh ka khyllipmat ba  la pyntreikam ia ka Model Code of Conduct, kaba hangne ba ka rukom pyndonkam pisa yn lah ban tehlakam da ka jingiarap lang na kiwei pat ki shlem treikam ka sorkar kum ka Income Tax, ka tnat Pulit bad ki kiwei kiwei.