Kyntu u CM ban bud ia ki dienjat u PA Sangma ha ka jingrakhe ia ka lyngkhuh sngi kha ba 76 jong u

Syllad | The Rising MeghalayaSeptember 1, 2023

“Ka jingai burom kaba shisha na ka bynta u (L) PA Sangma ka long ban bud ia ki dienjat bad ia ki rukom pyrkhat ki jong u, kata ban buh shwa ia la ka jong ka ri bad ia ki nongshong shnong hakhmat eh,” ong u Myntri Rangbah ka jylla u Conrad K Sangma haba aijingkren ha ka ‘7th PA Sangma Memorial Lecture’ shibynta jong ka  jingrakhe ia ka lyngkhuh sngi kha kaba 76 snem jong u PA Sangma ia kaba la khot pynlong da ka NEHU, Tura Campus bad ka PA Sangma Foundation hapoh District Auditorium, Tura mynta ka sngi Thohdieng.

U CM u la kyntu ia ki paidbah ba kin bun ia ki dienjat u kpa jong u da kaba ong lehse u dei uwei na ki riew khraw bad uba kham pawkhmat na kane ka thain shatei lammihngi North East region) kat haduh mynta.            

Ha kane ka jingialang la wan iashim bynta lang ruh da u journalist bad Editor-in-Chief ba pawkhmat u Shekhar Gupta kum u nongai jingkren ba kyrpang.

“U (L) PA Sangma u dei u nonghikai bad u nongialam ba shisha uba la hikai bad btin lynti ia ngi (ki khun) ban pynthikna barabor ba kaei kaei kaba ngi leh ha ka jingim, kata khamtam ha ki kam sain hima sima, ka dei ba ngin phaikhmat shwa nyngkong sha ki paidbah bad ban pynthikna ba man ki jingshim rai kiba ngi shim ka dei ban long kaba bha na ka bynta ki paidbah ka jylla bad jong ka ri,” ong u CM.

Nalor kata u la ong ruh ba u PA Sangma uba dei ruh u Lamphang barim jong ka Lok Sabha u dei u briew uba la ioh ia ka jingieit jong u paidbah. “Haba ngi phai sha kine ki maw nongrim, ngi peit ia kane ka auditorium kaba ua la tei ha u snem 1988, ngi kynmaw ba dei ma u uba la pynurlong ia kane. Hynrei, kaei ka jingiapher halor ki nongrim bad ki jingpyrkhat kiba u la iasam bad ngi kin iai sah junom, bad kine lehse ki dei ki jingnoh synniang kiba shisha kiba u la noh synniang shisha ha ki nongshong shnong ki jong ngi,” ong u Conrad Sangma.

Haba kyntu khamtam ia ki samla ba kin pule bniah halor ka jingim jong ka u PA Sangma lyngba ki jinghikai bad ki rukom pyrkhat ki jong u, u CM u la ong ba ka jingai burom ba khraw na ka bynta jong u ka dei ka jingkynmaw ia u, bad ka lynti ban kynmaw ia u ka long ban iaid ha ki dienjat ki jong u, kata ka lynti ban ieit iala ki jong ki briew, ka lynti ban pynneh ia ki nongrim ki jong u bad ruh ban kynmaw ban buh shwa ia ka ri bad ki nongshong shnong hakhmat eh.

Katba na ka liang u Shekhar Gupta ha ka jingkren u la pynpaw ba u PA Sangma u la leit kloi noh bad ba ki dang don shibun kiba dang dei ban leh na ka bynta ki nongshong shnong riewlum jong ka ri India.

U la pynpaw ruh halor ka jingshisha ba 8 percent na ki nongshong shnong jong ka ri India ki dei ki riewlum, kata kiba don kumba 10-11 klur, kaba mut ba ka India ka dei kaba don bun eh ki trai shnong riewlum ha ka pyrthei baroh kawei. Hynrei, ym pat shym la don iwei ruh ki nongialam trai shnong ki ban long ki nongialam hapoh ka ri bad ki ban mihkhmat ia ka sur jong kine ki nongshong shnong kiba saphriang ha kylleng ka ri. Kane ka dei ka bynta kaba u PA Sangma ula iehnoh, namar u kiew sha kaba kum kane ka kyrdan bad ia uba la iohi kum u nongialam jong ki paid riewlum uba mihkhmat na ka bynta baroh ki trai shnong riewlum jong ka India.