Kyntu u CM ban kyntait ia ki party ba pyrshang wanrah ka jingsngew iapher jaidbynriew

Syllad | The Rising MeghalayaFebruary 18, 2025

U National President ka National People’s Party (NPP) bad Myntri Rangbah ka Jylla, u Conrad K Sangma haka 18 tarik Rymphang u la kyntu ia ki paidbah nongthep vote ba kin kyntait ia ki seng sain pyrthei kiba pyrshang ban wanrah ka jingsngew iapher jaidbynriew ha kane ka elekshon sha ka KHADC bad JHADC ka ban long ha ka 21 tarik Rymphang.

“Kane ka elekshon ka ban wan ka dei ka kabu ban ai ka jubab kaba biang pyrshah ia kito ki party kiba pyrshang ban wanrah ka jingiapait iapra hapdeng ki briew jong ngi,”ong u Conrad haba kren ha ka jingialang ialap elekshon ha Dangar hapoh Mawsynram constituency.

“Ngi dei ban kyntait mardor ia ki party kiba pyrshang ban pyniapait iapra hapdeng ki briew jong ngi,” u la ong da kaba bynta, “Ngi dei ban ieng tyngeh pyrshah ia ka sain pyrthei jong ka jingpyniapait iapra bad ban weng sharud ia kum kine ki party kiba pyrshang ban wanrah ka jingiashun bad iapait iapra hapdeng ki briew jong ngi.”

Une u khliehduh ka NPP u la ong ba ka jingthep vote ka dei ka hok jong ki paidbah ba la pynkupbor da ka riti synshar ri, bad ban jur ba kam don satia kano kano ka jingthmu ban ym shah ia ki trai ri trai muluk ba kin leit thep vote lane ban pynduh ia ki jaidbynriew riewlum ba rit paid ha ka elekshon MDC ha Rilum Khasi bad Jaintia.

U CM u la leit ruh ban ialap elekshon ha Cherrakata, Pataghat bad Mawsynram ban pan jingkyrshan ia u kyrtong ka NPP u Bah Alvin Sawkmie.

Haba pynkynmaw ia ki jingkular ba la pynurlong hadien ka elekshon KHADC 2019, khamtam ha ki thain khappud ka India -Bangladesh, u Conrad u la ong, “Nga la ithuh ia ki jingeh kiba ki briew jong ngi kiba shong ba sah ha ki thain khappud ki iakynduh, bad ngi la shim ia ki sienjam ban pynthikna halor ki kam pynroi bad ban kyntiew na ka bynta ka bha ka miat jong ki nongshong shnong.”

“Ki briew kiba shong ha ki thain khappud ki la shah iehbein la slem bha, hynrei ngi la pyndep ia ki jingkular da ka jingpynioh ia ka surok Balat-Dangar-Ryngku ia kaba la dep kular ha ka jingialap elekshon KHADC ha u 2019,” u la bynrap.

U Myntri Rangbah u la ong ruh ba ka sorkar NPP ka ngeit skhem na ka bynta ka bha ka miat jong ki paid nongshong shnong bad ka la pynurlong ia ki jingkular jong ka. U pyntip ruh ha ka jingialang ba ka project kaba T.50 klur kan nangpynsuk shuh shuh ia ki paidbah, kata haba kdew ruh ia ka surok Weiloi- Mawsynram kaba T.100 klur kaba la pyntrei mynta shaid shaid hapoh ka project ba la bei tyngka da ka World Bank.

“Ki liang pyrshah ki lah ban kren katba kren, hynrei kim pat ju sha ia ka surok ne ka jingkieng hapoh kane ka thain. Ka NPP ka la pynthikna halor ka jingshna ia ka surok bad ka jingkieng ha Khasipara ka dei kaba dang shna pynwandur bad ia kaba yn sa pyndep noh shen,” u la bynrap.

Nalor kata u la kyntu ia ki paidbah ba kin pynioh biang ia ka jingshaniah jong ki ha ka NPP kumba ki la jied ia ka sorkar ha ka elekshon KHADC 2019 kaba la pynkupbor na ka bynta ban wanrah ia ka roi ka par.

U Conrad u la kubur ruh halor ka jingshah iehbein jong ki briew kiba shong ba sah ha khappud ka India -Bangladesh mynta lah kumba 50 snem, bad bynrap ba donkam ia u nongialam uba tbit bad kotbor ban mihkhmihat ia ki nongshong shnong.

U la ong ruh, “Nga la ialap elekshon ha ki thain khappud ha ka por elekshon bad ki paidbah ki iatylli bad ka NPP, bad ki la kut jingmut ruh ban trei bad nangpynkhlain ia ka NPP khnang ban nangkyntiew ia ki kam pynroi ia ka Meghalaya.”

Ha kajuh ka por u CM u pynthikna ia ki paidbah ba un iai iadon ryngkat bad ki bad ban pynthikna na ka bynta ka roi ka par hapoh ka thain.