Kyntu u CM ban pynioh mardor ia ki jingiarap sha ki lanot ba shah lynshop ha ki bor mariang

Syllad | The Rising MeghalayaMay 7, 2024

U Myntri Rangbah ka Jylla u Conrad K Sangma haka 6 tarik Jymmang u la bthah ia ki bor pyniaid district bapher bapher ba kin pynioh mardor ia ki lad jingiarap sha kito ki longiing kiba shah ktah na ka jingshah lynshop ha ki bor ka mariang ha ki hynniew tylli ki district ka jylla.

Ki la don haduh kumba 400 tylli ki iing ki sem kiba la shah pynjulor bad palat 940 ngut ki briew kiba la shah ktah na ka jingsyllad jong u ‘lapbah bad ka ‘eriong kaba la jia ha ka 5 tarik mynta u bnai.

“Ha ka 5 tarik sngi U Blei ka ‘eriong ‘erngit kaba jur ha ryngkat u ‘lapbah ka la syllad tyngeh ia ki bynta jong ka jylla ha kaba hynniew tylli ki district ki la shah ktah bad kumba 400 tylli ki iing ki sem ki la shah pynjur, bad kumta ruh mardor ka la kyntu ia ki bor pyniaid district bad ia ki tnat ba dei khmih ba kin ai mardor ia ki lad jingiarap kum ki tiar ki tar bad kiwei pat sha kitei ki longiing kiba la shah ktah bad ki sienjam kila iaid shakhmat ha kaba pynpoi ia ki lad jingiarap kaba kynthup ia ki tin sop iing ne CGI sheet sha kito ki longiing kiba la shah pynjulor,” ong u Conrad.

Nalor kata u la ong ruh ba na ka liang ka sorkar ka la pynkylla ia ki kyndon ka ban shah ia ki Deputy Commissioner ba kin shim ia ka bynta ban sam ia ki CGI Sheet sha ki lanot tang ha ka kyrdan jong ki district.

“Ha ki por kiba la dep haba jia kum kine ki jingjia, ki kyndon ki shah tang ban sam ia u khaw bad kiwei pat ki mar bam ba dei ban sam kyrkieh katba kiwei pat ki tiar iing tiar sem kim hap ha ka bynta kaba donkam ban pynioh kyrkieh, hynrei ngi la pynkylla ia ki kyndon ha kine ki snem kiba la dep ha kaba mynta ki Deputy Commissioner ha la ka jong ka kyrdan khlem da ap ia ki jingmynjur na ki bor ka sorkar jylla ki lah ban sam ia ki CGI sheet hapoh ki kyrdan district da kaba pynshong nongrim ha la ka jong kas jingioh lum jingkhein,” ong u CM ka jylla.

Nalor kata u la ong ruh, “Kane ka la pynsuk shibun halor ki kam aijingiarap kiba ha ki por kiba la dep ki ju shimpor haduh kumba hynriew bnai bad wat haduh shi snem wat tang na ka bynta ban lah ban sam ia ki CGI sheet. Hynrei, ka jingpynkylla ia ki kyndon ki Deputy Commissioner mardor ki la lah ban leh ia kaba donkam bad mynta kiba bun ki longiing ki la dep ioh ia ki tiar ki tar kaba kynthup ia ki CGI sheet bad kito ki bym pat ioh ruh kin sa ioh hapoh ka 24 haduh ka 48 kynta.”