Kyntu u CM ban pynneh ia ka jingsuk hadien ka jingjia shah pyniap ha Rongmil, East Garo Hills

Syllad | The Rising MeghalayaApril 24, 2024

U Myntri Rangbah ka Jylla u Conrad K Sangma u pynpaw ka jingsngewsih halor ka jingjia shah pyniap dusmon jong ki laingut ki samla shynrang na Assam da kaba shang thang dusmon ha Rongmil, East Garo Hills kaba la jia ha ka 17 tarik mynta u bnai, bad ula buh ka jingkyntu ia ki nongshong shnong ka Meghalaya bad Assam ba kin kiar ban shim ia ka ain ha la ka jong ka kti bad kumjuh ruh ban leh ia ki kam pynhiar kput namar kane ka jingjia.

Na ka liang u Myntri u pynrem jur ha kaba iadei bad ka jinglap dien ia kine ki laitylli ki metiap kiba la ingkhong ba la tep hajan ka kali jong ki kaba la shah thang ha katei ka jaka kaba pynkynmaw ia ka kam leh dusmon kaba lah ban pynkhihwin ia ka jingiadei hapdeng ki paidbah nongshong shnong.

“Kiba kum kine ki jingleh kim dei ban ioh jaka ha ka imlang sahlang ka jong ngi, bad ka dei ka jingpynkhein ia ki hok longbriew manbriew. Ha kaba kum kane ka por kaba sngewsih kthang, ka long kaba donkam ba ngin wan shakhmat kum ki riew shimet bad ki nongshong shnong ban ai ka jingkyrshan bad jingsngewlem na ka bynta kito kiba la shah ktah ha kane ka apot,” ong u Conrad.

Ha kajuh ka por u la kyntu ruh ia ki nongshong shnong ka Meghalaya bad Assam ba kin kiar na ki kam pynhiar kput bad ban shim ia ka ain ha la ki jong ki kti halor kane ka jingjia bad ban ailad ban pynneh ia ka shongsuk shongsain.

“Nga kyrpad ia phi ban kiar na ki jingpynshai jong kito kiba kwah ban shim kabu lyngba kane ka jingjia na ka bynta ki jingthmu ioh jingmyntoi shimet ki jong ki, kata lyngba ka jingpynshit ban wanrah ka jingsngew iapher jaidbynriew lane ban pynphriang ia ki khubor ki bym shisha,” ong u CM ka jylla.

U Conrad u la ong ba na ka liang ki bor pulit ka jylla ki la dep ban shim ia ki sienjam ban pynlong ia ka jingtohkit kaba bniah halor katei kane ka jingjia khnang ba ki runar kiba donkti kin ym ioh lait suk na ka ain.

Ha kajuh ka por u Myntri Rangbah ula phah ruh ia u kyrwoh sngewlem sha ki bahaiing jong ki longiing ba shah ktah ha kane ka jingjia kaba sngewsih.