Kyntu u CM ia ka Sorkar Pdeng ban shim ia ki sienjam ban weng ia ki jingeh ha ka skulbah NEHU

Syllad | The Rising MeghalayaNovember 11, 2024

U Myntri Rangbah ka Jylla u Conrad K Sangma ha ka 10 tarik u Naiwieng u la kyntu ia ka Sorkar Pdeng ba kan shim ia ki sienjam da ka lynti kaba jai jai khnang ban lah ban wanrah biang ia ka jinglong jingman kaba iaid beit iaid ryntih hapoh ka skulbah North Eastern Hill University (NEHU).

U CM u la ong ba u la pyntip sha u Myntri ka Tnad pule puthi ka Sorkar Pdeng ia ka jinglong jingman bad kyntu ia u ba un wad ia ki lad ki lynti na ka bynta ban pynkut noh ia kane ka jinglong jingman kaba mynta.

“Nga la pyntip sha u Myntri ka Tnad Pule Puthi ba donburom u @dpradhanbjp halor ka jinglong jingman kaba dang iaid shakhmat ha ka skulbah NEHU bad kyntu ia u ban wad ia ki lad pyniasuk halor kane ka jingeh,” ong u CM

Ki runar bym lah ban ithuh ki la thombor ia ka iingsah bad ka kali jong u Vice Chancellor ka NEHU u Prof PS Shukla ha ka shiteng miet jong ka 9 tarik u Naiwieng, kata khyndiat por hadien ba u VC u la khot iakren biang ia ki samla pule ba pynlong jingiakhih na ka bynta ban iakren halor ki jingdawa ki jong ki.

Hynrei, na ka liang ki samla pule ba pynlong jingiakhih hapoh ka jingialam ka North Eastern Hill University Students’ Union (NEHUSU) bad ba la kyrshan da ka Khasi Students’ Union (KSU- NEHU Unit) kiba la dawa hiar shuki mardor ia u VC bad ban weng kam mardor ia u Regsitrar bad Deputy Registrar.

Shah lynthem maw ka iing bad ka kali u Vice Chancellor NEHU

Ka skulbah NEHU ka la don hapdeng ka jingkhangdam hadien ba kine ki samla pule ki la bteng ia ka jingshah thngan kaba la kynjoh sha ka sngi kaba hynriew haduh ha ka 10 tarik u Naiwieng bad kyntait ia ka jingkhot iakren jong u VC da kaba ong ba kin kren tad hadien ba u VC u la hiar shuki kum u khlieh jong kane ka skulbah.

Kane ka jingshah thngan ba khlem pud jong ki samla pule ka la nangkyntiew ruh ia ka jingdon jong ki samla kiba poi poi hospital namar ka jingkem tlot.