Kyntu u CM ia ki DC, SDO ban phaikhmat nyngkong sha ki paidbah ha ki jingtreikam

Syllad | The Rising MeghalayaMay 18, 2024

U Myntri Rangbah ka Jylla u Conrad K Sangma haba ai jingkren ha ka jingialang ba kongsan jong ki Deputy Commissioner bad ki Sub-Divisional Officer (Civil) haka 17 tarik Jymmang ha Shillong u la kyntu ba ki dei ban phaikhmat nyngkong eh sha ki paidbah hashwa ba kin shim ia kino kino ki rai.

U la kyntu ruh ia ki DC bad SDO ba kin iatreilang ryngkat ryngkat khnang ban pynthikna halor ka jinglah ban pyntreikam bha ia ki prokram bad ki skhim bapher bapher na ka bynta ka roi ka par jong ka Jylla.

Ha kane ka jingialang ba la ia don lang ruh u Myntri Sorkar u Bah Kyrmen Shylla, u CM u la kren ruh ha kaba iadei bad ka thong jong ka Jylla ban kynjoh sha ka ioh ka kot kaba 10 billion US dollar, kaba pyniasoh bad ki 10 tylli ki kabu bad ki jingkut jingmut jong ka sorkar.U la ong ruh ba baroh ki heh sorkar ki dei ban ai ka jingiatreilang ryngkat ryngkat ban poi sha kane ka thong.

U la pyntip ruh ba ki jingpyni dak bapher bapher halor ka ioh ka kot bad ka roi ka par ki la kiew bha ha kine ki hynriew snem kiba la dep.

 “Ngi la lah ban leh kham bha ha kaba pyntreikam ia ki skhim bapher bapher ka sorkar pdeng bad sorkar jylla lyngba ka lynti jong ka jingiatreilang, ka jingbishar bniah, ka jingkut jingmut bad ka jingkhuid ha ki rukom treikam,” bynrap u Conrad.

Nalor kata u CM u kyntu ruh ia ki DC bad ki SDO ba kin pynlong ia ki jingleit jurip ba khah khah sha ki skul, hospital, PHC, CHC bad kiwei pat bad ban ai ia ka kaiphot sha ka sorkar lyngba ki kor ki bor jong kane ka juk ba mynta khnang ba kin lah ban shim ia ka rai.

Kane ka jingialang ka dei ruh kaba thmu ban pyntip sha ki heh sorkar halor ki sienjam bapher bapher ba la shim da ka sorkar na ka bynta ban pyniaid shakhmat ia ki kam pynroi da kaba pynshong nongrim lyngba ki jingkhein jingdiah ba la ioh lum.

“Kane ka jingialang ka long kaba kongsan namar ki jingioh  jingpyntip lyngba ki DC bad ki SDO ki long kiba kongsan shibun na ka bynta u paidbah,” ong u CM.

Shuh shuh ha kane ka jingialang u Commissoner and Secretary u Dr Vijay Kumar ula batai bniah halor ki prokram ba pyntreikam lyngba ki technology kaba kynthup ia ka rynsan CM-Connect bad ka rynsan DC-Connect.