Kyntu u CM ia ki ophisar MCS thymmai ban buh shwa ia u paidbah hakhmat ha ka jingshakri

Syllad | The Rising MeghalayaFebruary 26, 2025

U Myntri Rangbah ka jylla u Conrad K Sangma ha ka 25 tarik Rymphang u la iashim bynta ha ka Training Programme na ka bynta ban pynrung kam ia ki 35 ngut ki Ophisar Meghalaya Civil Service (MCS), Batch 2025, ha ka jingialang kaba la long ha Meghalaya Administrative Training Institute (MATI), Shillong.

Haba kren hapdeng ki ophisar thymmai, u CM u la ai khublei ia ki halor ka jingshah jied bad u la pynkynmaw ia ki halor ka jingkitkhlieh bad ka jingthmu jong ka jingshakri paidbah. U la kyntu ruh ia ki ba ki dei pyniar ia ka jingphaikhmat bad ban trei da ka jingieit, ka jingjaijai bad ban buh ia u paidbah hakhmat.

“Phin jam sha ka kyrdan ban bat ia ka bor, hynrei ka jinglong nongialam ka long ban shakri ym na ka bynta ka bor.Ka jingshim rai ka jong phi kan ktah beit beit ia ka jingim jong ki briew. U khulom uba phi bat u kham khrawbor ban ia ka waitlam, kaba lah ban pynioh ia ka jingbishar hok, ban pynbeit ia ki jingeh bad ban wanrah ia ki jingkylla, pyndonkam bha ia ka,” u la kyntu.

U CM u la ban jur ruh halor ka jingkongsan ban long kiba don akor, ka jinglong ryntih da kaba kyntu ruh ia kine ki ophisar ba kin ieng skhem ha ka nongrim ka jong ki wat hapdeng kiba bun ki jingeh. U la aijingmut ruh ia ki ban shimti ia ki kam kiba eh da ki jingmut jingpyrkhat kiba bha bad ban shim ia ki jingeh kum ka kabu ban nangkiew shaphrang.

Haba pyntip halor ka jingiohi jngai jong ka Jylla Meghalaya na ka bynta ka roi ka par, u la kyntu ia ki ophisar ba kin pule bad sngewthuh ia ka kot Meghalaya Vision 2032, kaba kdew halor ka thong jong ka jylla ban long ka jylla kaba don ha ka kyrdan kaba 10 ha ka GDP Ranking jong ka ri India.

Haba ban jur halor ka jingdonkam ban bteng ban pule, u la ong, “Ka jinghikai kam kut tang hangne.Man la ki kam kiba phi leit ban bat ne trei kan long ka lad ban tei bad ioh jinghikai. Long kiba tip ia kiei kiei kiba thymmai, ban tip ia ki skhim sorkar bad barabor pyrshang ban thaw ia ki lad ki lynti ki ban wanrah ka jingkylla kaba shisha.”

Na ka liang ka Director General jong ka MATI, ka Kong R.V. Suchiang, IAS (Retd.), ka la kren halor ki jingeh bad ka jingkitklieh jon ki ha ka kam aijingshakri sha ki paidbah bad ka pynkynmaw ruh ia ki ophisar kiba la ioh jinghikai ba ka jingdon ia ka nongrim bad ka akor ka burom ka long kaba kongsan ha ka kam shakri paidbah.

“Kin don ki por ha kaba phin hap ban jied hapdeng kaei kaei kaba suk bad kaei kaba dei. Jied da ka jingshemphang, namar ka jingjied da ka lynt kaba kloi kan lam sha ka jinghiar ha ka jingtbit bad ka jinglah jong phi,” ka la ong.

Katba u Additional Chief Secretary u Shakil Ahmed u la kren halor ka jingdonkam ban long kum ki nongialam kiba khlain, ka jingiatreilang bad ka jingshim ia ki rai kiba kongsan.

Ha kane ka prokram la wan iashim bynta ruh da ki heh ophisar ka jylla kiba kynthup ia u Commissioner & Secretary ka Tnad Personnel nalor kiwei kiwei.