Kyntu u CM ia u Amit Shah ban pynkhlain bor pahara shuh shuh ha khappud India-Bangladesh

Syllad | The Rising MeghalayaAugust 12, 2024

Ka Sorkar Jylla ka la pan bor pahara shuh shuh khnang ban pynkhlain ia ki kam pahara ha ki thain khappud namar ka jinglong jingman sain hima ha ka ri Bangladesh nalor ka jingpyrshang borbah jong ki briew na katei ka ri ban wan rung beain sha India.

“Ngi la kyntu ia ka Sorkar India lyngba u Myntri kam Pohiing u Amit Shah ba lada ka long kaba donkam kin phah shuh shuh ia ki bor pahara ban pynjur ia ka jingpahara ha ki jaka khappud,” ong u Myntri Rangbah ka Jylla u Conrad K Sangma ha ka jingiakynduh ia une u Myntri ka sorkar Pdeng ha New Delhi ban iakren halor ka jinglong jingman ha ki jaka khappud jong ka ri.

“Halor kane ka jingkyrpad na ka liang u Myntri ka sorkar Pdeng ruh u la pynpaw ba un sa shong bishar bniah ia ka jinglong jingman bad ban shim ia ki sienjam kiba donkam,” ong u Conrad.     

Ha kane ka jingleit iakynduh ia u Shah la synran lang ia u CM da u Symbud Myntri Rangbah ka Jylla uba khmih ia ka tnad Home u Bah Prestone Tynsong.

Na ka liang u CM u la pyntip ruh ba ha kane ka jingialang ki la ioh ban pynshai bniah sha une u Myntri ka sorkar Pdeng ba ki BSF bad ki bor shipai ki la trei borbah ban pyrkhing ia ki jaka khappud ha ryngkat ka jingiatreilang bad ki bor pulit ka Jylla.

“Ngi la pyntip ruh sha u ba ngi la pynjari da ka korphiw miet ha shilynter ki jaka khappud bad ka Bangladesh khnang ban nangpynkhlain ia ka jingpahara bad ka jingshngain jong ki shnong khappud,” bynrap u CM da kaba ong ruh, “Ngi la iai ban ia u Myntri kam Pohiing jong ka ri ba ngim dei ban ailad ha kaba kum kane ka khep ia kino kino ki briew ba kin jam ia u pud u sam namar kane ka dei ka kam kaba khia shibun ha kaba ngi la dep ruh ban iakren sani bha halor kane ka phang.”    

Na ka liang u Amit Shah u la bynrap ruh ba na ka laing ka sorkar India kan ym ailad da lei lei ruh ia kino kino ki briew ba kin wan rung sha shiliang khappud bad ka la shim ruh ia baroh ki sienjam ban pynthikna ba ki jaka khappud kin dei kiba pyrkhing bha ia ka jingpahara.