Kyntu u CM ia u Myntri sorkar pdeng ban pynkynriah ia ki samla pule Meghalaya na CAU Imphal sha Kyrdemkulai

Syllad | The Rising MeghalayaAugust 8, 2023

U Myntri Rangbah ka Meghalaya u Conrad K Sangma u la ai da ka jingthoh sha u Myntri ka sorkar pdeng uba khmih ia ka tnat Agriculture & Farmers Welfare, u Narendra Singh Tomar ha kaba u la kyrpad ia ka jingtuklar lem ka jong u ban pynbit pynbiang na ka bynta ka jingpynkynriah ia ki samla pule ka jylla Meghalaya kiba dei ban bteng ia ka jingpule 4th year BSc Agriculture napoh CAU ha Imphal.

U CM u la ong ba kine ki samla pule kim shym la iohlad shuh ban pyndep ia ka Rural Agriculture Work Experience (RAWE) Programme ha Manipur namar ka jingiakynad kaba dang iai bteng ha kane ka jylla.U la kyrpad ruh ia utei u Myntri ba un shah ia kine ki samla pule ba kin pyndep ia kane ka RAWE programme jong ki hapoh ka jingkhmih jong ka CAU kaba don ha Kyrdemkulai, kaba dei ruh ka bynta jong ka CAU ha Imphal.

Nalor kata u Sangma u la kyrpad ruh ia une u Myntri ka sorkar pdeng na ka bynta ban pynkynriah ia baroh ki samla pule ka jylla napoh ka CAU Imphal sha ka CAU Campus ha Kyrdemkulai, Meghalaya tad haduh ba ka jingsuk kan wanphai pat ha Manipur.U la ong ba kane kan pynthikna ba ki samla pule kin ioh lad pat ban bteng ia ki jingpule ki jong ki khlem kano kano ka jingthut.

Shuh shuh u CM u pynpaw ruh ka jingsngewsuh ia u Tomar halor ka jingkular jong ka tnat Agriculture and Farmer’s Welfare ha kaba iadei bad kane ka bynta.

Ha kajuh ka por u la kdew ruh kumno ba ka sorkar jylla ha ryngkat ka jingiatreilang bad ka sorkar pdeng ki la shim ia ki sienjam na ka bynta ka jingwanphai suk jong ki nong Meghalaya napoh Manipur ha ka por ba ka jingiakynad ka dang jur bha.

Lah ban kdew ba haduh 80 percent na ki nongshong shnong ka jylla ki dei kiba shaniah tylli ha ka rep ka riang na ka bynta ka jingim kaba man la ka sngi.Kumta ruh kane ka jingtuklar biang por jong u CM kan iarap ban pynthikna ba ki samla pule ka jylla kin ioh ia ka lad basn bteng ia ki jingpule jong ki bad bad noh synniang ban kyntiew ia ka roi ka par ha ka liang ka rep ka riang.