Kyntu u Dy CM ban jied biang ia u MDC ka Mawphlang-Diengiei ba pynurlong ka NPP ia ki jingkular

Syllad | The Rising MeghalayaFebruary 18, 2025

U President ka National People’s Party (NPP) bad Symbud Myntri Rangbah ka Jylla, u Bah Prestone Tynsong ha ka 17 tarik Rymphang u la kyntu ia ki paidbah ka Mawphlang-Diengiei ba kin jied biang ia u MDC ba mynta uba dei ruh u Chairman ka KHADC u Bah Lamphrang Blah kum ka dak ka jingburom ia ka party NPP namar ka jingpynurlong ia baroh ki jingkular na ka bynta ka constituency.

Ha ka jingkren ialap elekshon ha Mangap, u Bah Tynsong u la ong, “Ngi la pynurlong ia baroh ki jingkular jong ngi ha ka elekshon ba ladep, kata la ka long ha ka liang ki surok, sub division, college bad hospital. Nga tip ba ki don don bun ki kam ia kiba dang dei ban leh, hynrei nga kwah ban kyrpad ia phi ba kum ka dak ka jingburom ia ka NPP bad nga kum u President ka party ka Jylla ba phin ai biang ka jingkyrshan kaba pura ia u Bah Lamphrang Blah uba la shah jied haduh saw samoi kynthih.U dei u nongialam uba la shemphang bha.”

“U Bah Lamphrang um shym la jop ha ka elekshon MLA. Nga la wad bniah bad nga sngewthuh dei namar ba u dei u MDC. Nga i ba ngi donkam la ka jong u MDC bad MLA. Kumta ngi dei ban ailad biang ia u sa shisien namar u dei uba la tbit bha bad mynta u la bat ia buntylli ki kam hapoh KHADC,” u la bynrap.

Halor ka jingkynnoh high level pyrshah ia ka NPP, u Bah Tynsong u la ong, “Ki liang pyrshah ki la pynmih ia kum kine ki jingkynnoh la kumba ki don ia ki sakhi satar. Ngam pat shym la iohi ba kin mudui ejahar pyrshah ia u Bah Prestone ne Conrad ne kino kino ki Myntri, hynrei ki la mudui ejahar pynban ia kito kiba kren pyrshah ia ki ha ki social media. Kane ka dei tang ka jingpynlut por namar ba kim lah ban ioh ia ki vote jong ki. Ki la shu kren baheh, hynrei nga ong lada phi nud ban ujor mukotduma pyrshah ia ki Dorbar Shnong kan eh aiu ia ngi?

Haba pynpaw ba ka sorkar kam lah satia ban pynkhein ia ki rule kiba iadei bad ka jingpyndonkam ia ka pisa, u Dy.CM u la ong, “Ka Sorkar India ka don ia ka CAG ka bym mab iano iano kiba pynkhein ne kiba donkti ha ki kam bamsap. Kumta, wad ia ka jingshisha ha ka jaka ban ngeit ia ki kam thok jong ki kynhun ialeh pyrshah.”

Haba kynthoh tyngeh ia ka liang pyrshah Voice of the People Party (VPP), u Bah Prestone u la ong, “U nongialam ka UDP u la kdew ia kaba dei eh haba u ong ba ki ia don tang saw ngut ki MLA hynrei ka jingiashrut hapoh ka party ka la jur bha. Shu mutdur lada ki don 32 ngut ki MLA, nga tharai kan dei ka jingsdang jong ka thma bah kaba lai.”

Haba kyntu ia ki paidbah ba kim dei ban shah ialam bakla ha ki liang pyrshah, u Bah Tynsong u la ong, “Ngi la kut jingmut skhem ban wanrah ia ka roi ka par ha man la ki constituency. Ka EC ba la ialam da ka NPP ha KHADC ka la thaw histori namar ka jinglah ban pynioh ia ka jingmynjur jong u Lat ka Jylla ia ki hynniew tylli ki Bill. Kane ka la wan urlong namar ka jingiatreilang ki ADC bad ka sorkar Jylla.”

Haba pynpaw ia ki jingjop jong ka sorkar MDA ba la ialam da ka NPP, u MLA barim ka Mawsynram u Bah Himalaya Shangpliang u la ong, “Haduh palat 2000 ngut la thung kam ha ka tnad pulit. Mynta u snem, ngin bteng ban thung kam shuh shuh ha kane ka tnad.”

U la ong ruh ba ka Meghalaya kan sa ioh haduh 1 lak tylli ki Iing na ka bynta ki longiing ba duk mynta u snem.

“Shen ngin sa plie ruh ia ka kolej science bad ka jingthung nonghikai ruh kan sdang. Ka dei ka kolej sorkar bad ka bai skul kan long kaba biang. Kane ka lah ban long namar u Lamphrang Blah, namar u trei kum ka jingkieng hapdeng jong phi bad ka sorkar. U la leit ban iakren bad ka sorkar bad ia kine ki kam pynroi la ai. Namarkata, phin sngewsih lada phim lah ban jied biang ia u kum u MDC jong phi,” u la bynrap.