Kyntu u Dy.CM ia ka VPP ban ym pynkylla politik na ka ishu Them Iew Mawlong

Syllad | The Rising MeghalayaDecember 12, 2023

U Symbud Myntri Rangbah ka jylla uba khmih ia ka Tnat kam pohiing, u Bah Prestone Tynsong haka 11 tarik Nohprah u la kyntu ia ka liang pyrshah Voice of the People Party (VPP) ba ka dei ban kiar ban pynkylla kam politik lyngba ka mat kaba iadei bad ka jingthmu pynkynriah ia ki 342 tylli ki longiing Harijan na Them Iew Mawlong sha ka jaka ba la longtrai da ka Shillong Municipal Board (SMB).

Kane ka la wan long shi sngi hadien ba ka Seng VPP ka la pynpaw ka jingpyrshah ia ka jingshim rai jong ka sorkar ban bhah shuh shuh sa 1.4 akar ka jaka na ka bynta ban pynkynriah ia kine ki longiing Harijan na Them Iew Mawlong.

Haba kren sha ki lad pathai khubor, u Bah Tynsong u la ong; “Kito ki nongialam kiba kynthoh pyrshah ia ka jingshim rai jong ka sorkar ki dei kiba ialehkai politik. Kane ka dei tang ka kam ialehkai politik khlem da tip ia ki jingshisha baroh, khlem da tip ia ka jingdon jong ki longiing jong katei ka jaka. Kumta Ngam kwah ban iatai nia, Ngam kwah ban pynlut por ha kiba kum kine ki jait ishu kaba ki wanrah.”

U la ong ruh; “Haba ngi pynpaw ba ngi donkam sa 1.4 akar ka jaka kam mut ba kane ka jaka la aiti sha kine ki briew, hynrei ka mut ba la aiti ia ka sha ka Shillong Municipal Board, ka kut tang kumta hi. Kam dei ba ki ioh ban longtrai namar ka dei ka jaka jong ka SMB. Kane kadei kaba Nga ong wat leh politik ia ka bym don jingmut. Lada phi donkam ka jingpynshai, wan iakynduh ia nga, Ngan batai bniah ha phi halor kane ka bynta baroh.”