Kyntu u Dy CM ia ki paid Jaintia ban vote ia ka NPP kaba kham bun ka kam ban ia ka ktien

Syllad | The Rising MeghalayaFebruary 13, 2025

U National General Secretary ka National People’s Party (NPP) bad Symbud Myntri Rangbah ka Jylla u Bah Sniawbhalang Dhar haka 12 tarik u la kyntu ia ki paid ka Rilum Jaintia ba kin vote ia ka NPP ha kane ka elekshon ADC namar ka dei ka party kaba kham bun ka kam ban ia ka ktien.

Haba kren ha ka jingialang ialap elekshon ha ka shnong Iongkaluh ban pan jingkyrshan ia u Bah Phasmon Dkhar uba la long MDC arsien kynthih bad uba dei ruh u kyrtong jong ka party na Musniang-Rangad, u Bah Sniawbhalang u la ong, “Ha ka por elekshon, kiwei pat ki party sain pyrthei kin wan bad ai ki jingkular kiba heh hynrei phi dei ban kynmaw ba ka NPP ka dei ka party kaba shim bynta tang 2% ha ki jingkren hynrei 98% ha ki kam.

“Ki don kiba kynnoh ba ka NPP ka don bynta ha ki kam leh donbor bad leh shiliang, hynrei lada ngi leh shisha kumta balei ngin theh da ki klur ka pisa na ka bynta ki kam pynroi hapoh ki constituency kum ha Khliehriat kaba don ia u MLA uba dei na ka seng United Democratic Party (UDP). Ngi la mang da ki klur tyngka na ka bynta ki kam pynroi ka ban pynmyntoi ia u paidbah. Kumta, nga kyntu ia ki paidbah ba kin shim ia ka rai kaba stad hahswa ban thep ia ki vote jong ki.Kane ka long namar ka shi vote ka dei kaba treikam na ka bynta 1825 sngi, kata kaba kut na ka bynta san snem,” u la ong.

Kumjuh haba kyntu ia ki paidbah ka Iongkaluh ban bteng ban ai ka jingshaniah ia ka NPP da kaba jied biang ia u Bah Phasmon, u Symbud Myntri Rangbah u la ong, “Nga kyntu ia ki paidbah ban ai ka jingkyrshan ba pura ia u Bah Phasmon lada phi kwah ia ka sorkar ar enjin.Ym tang kata, vote ia u namar u dei u nongialam uba la shemphang bad ruh u Executive Member uba trei shitom bad uba la noh synniang shibun sha ka constituency bad ka thain.”

“Kumta, pynthikna ba un ioh palat 1200 vote bad hadien ka elekshon, u lah barabor ban pyndik ia nga ha kaba iadei bad ki jingdonkam ki shnong ki shnong ki thaw ki jong phi,” kular u Dhar.

Une u nongialam ka NPP u la ong ruh ba ym donkam ban tieng ban smiej ia ka liang pyrshah Voice of the People Party (VPP) namar tang kito ki bym kwah ia ka roi ka par kaba shisha ki ban vote ia ki.

“Nga shim ruh ia kane ka kabu ban kyrpad ia baroh ki paidbah ba kim dei ban pynlehnoei ia ka vote ka jong ki da kaba pynshong nongrim halor ka jingsngewtynnad ka jingrwai elekshon, hynrei ban vote na ka bynta ka roi ka par,” u la ong da kaba ong ba ka Sorkar ba la ialam da ka NPP ka la lah ban wanrah ia ki kam pynroi kiba da ki klur ki kur ha kine ki hynniew snem kiba la dep.

“Ki briew ki kynthoh pyrshah ia ngi namar ngi dei ka sorkar kaba treikam. Ka sorkar ka bym donkam ban ialeh pyrshah ia ki jingkynnoh ka dei ka sorkar ka bym shym la treikam.Kumta nga kyntu ia phi ban vote ia ka NPP na ka bynta ka sorkar kaba skhem,” u la ong.

U Dhar u la iathuh lypa ruh ba ka VPP kan ym kynjoh hapoh ka 10 seat ha kane ka elekshon ADC, bad ong, “Ha kane ka kynti nga tharai kin ym jop palat ia ka 6 seat namar ki paidbah ki la sngewthuh ba ka long kumba pynsyrwa kai ban jop lada ym don ka roi ka par.”