Kyntu u DyCM ban pynjop biang ia u Bah Alvin na ka bynta ka roi ka par jong ka constituency

Syllad | The Rising MeghalayaFebruary 19, 2025

U President ka National People’s Party (NPP) Meghalaya bad Symbud Myntri Rangbah ka Jylla, u Bah Prestone Tynsong u la kyntu ia ki paidbah ka Mawsynram ba kin jied biang ia u MDC ba myna u Bah Alvin Khyriem Sawkmie na ka bynta ka roi ka par jong ka constituency hi baroh kawei.

Ia kane u bah Prestone u la pynpaw haba kren ha ka jingialang ialap elekshon ha ka shnong Lawbah bad Syntein ha ka 17 tarik Rymphang.

“Nga kyntu ia ki paidbah jong ki san tylli ki shnong ba kin jied biang ia u MDC ba mynta ha ka jaka ban shah pynbiej ha kiwei pat ki kyrtong namar la kular skhem ban bteng ban wanrah ia ki kam pynroi hapoh ka constituency,” ong u Bah Tynsong haba kren ha ka shnong Syntein.

Da kaba pynpaw ba ka elekshon ADC ka dei kaba kongsan bha, u la ong kane ka long namar ba ka party ka angnud ban nang pynkhlain shuh shuh ia ka riti dustur ba riewspah jong ka jaidbynriew.

U Bah Prestone u la pynpaw ruh ka jingsngew skhem ba ki paidbah kin vote ia ka NPP bad ong, “Nga kular ruh ha phi ba ngin pynioh mobile tower nalor ka iingshnong, ka jingkieng bad kiwei kiwei lada phin jied biang ia u Bah Sawkmie napoh ka constituency. Ngi sngewthuh ba ki paidbah ka Syntein ki duh nong shibun namar ka jingbym don mobile tower.Nga kular ruh ba ngan sa wan jurip mardor ban pynthikna ia ka jingpynroi shuh shuh ia ka thain hi baroh kawei,”

Katba u Bah Alvin ha ka jingkren u la kular ban shim ia ki sienjam ban weng ia ki jingeh kiba ki paid nongrep ka thain ki iakynduh.

“Ngi la wanrah ia ka Market Act ban weng ia ki jingeh jong ki nongrep, kata ia kaba ka Executive Committee kiba la leit kim shym la lah ban leh.Hapoh ka jinialam jong ka NPP, ngi la lah ban weng noh ia ka jingot kilo ia ki mar rep ha Iewduh.Ka jingthmu jong kane ka Act ka long ban iada ia ki hok jong ki nongrep. Nga kular ruh sha phi ban iakren ia ki jingeh jong ki nongrep synsar.Ngi wan hangne na ka bynta jong phi bad ban thaw ia ki ain bapher bapher na ka bynta jong phi,” u la ong.

Nalor kata u la ban jur halor ka jingdonkam ba ka KHADC ban nang wanrah shuh shuh ia ki ain kiba treikam na ka bynta ban ai jingiada ia ki trai ri trai muluk.

Katba na ka liang u MLA barim u Bah Himalaya Shangpliang ula pyntip ba ka jingshna ia ka surok na Weiloi sha Phlangwanbroi kan sa sdang noh shen bad ka Sorkar kala tyrwa ruh ban mang pisa ia kawei pat ka surok na Phlangwanbroi sha Dangar.