Kyntu u heh ka AITC ban buh ia ki Rehab Centre na ka bynta kiba dih drok ha man ki District

Syllad | The Rising MeghalayaDecember 4, 2024

U President ka AITC ka Meghalaya bad MLA ka Nongthymmai u Bah Charles Pyngrope u la ban jur halor ka jingdonkam ban buh ia ki rehabilitation centre ha man la ki district ka Jylla khnang ban lah ban leh ei ei halor ka jingnang jyllei ka jingdon jong ki nongdih drok hapoh ka Jylla.

Haba kren sha ki lad pathai khubor ha ka 3 tarik Nohprah, u Bah Charles u la ong, “Nga tharai ngi la dep ban iakren sani bha ia kane ka phang hapoh ka Dorbar Synrai jong ka iingdorbar thaw ain, bad ka dei ka kam kaba sngewkhia jur, bad katto katne ki jingai jingmut kiba la rah da ka liang pyrshah ki dei kiba kongsan bha, kata ba ngi donkam ban tei ia ki jingtei ba kongsan ha man la ki district bad ban ai jaka sah ia kito ki nongdih drok ba kin ioh ia ki lad jinsumar. Ngim lah satia ban shu shaniah tang ha ki centre ki riew shimet. Kane ka dei ka mat kaba hap ban shimkhia da ka Tnad bad ka Sorkar hi baroh kawei,”

U la ong ba ka sorkar ka dei ban mih shakhmat khlem da pynslem namar ka jingshna ia ki jingtei ka long kaba kongsan bha namar phi donkam ia ka iing ban pynsah ia ki la kumno kumno kumba shi snem.

Haba iaroh ia ki sienjam ba la shim da ka sorkar ban tehlakam ia u drok, u Bah Charles u la ong, “Hynrei ka donkam ban pynsted ia ki kam da kaba khmih halor ka jingpur stad jong kane ka jingeh.”

Haba kylli, une u MLA ka Nongthymmai u la ong, “Nga khmih ia kane ka bynta ha ka lynti kaba kham pher. Ki don ruh ki Seng kiba trei hok bad nga ju iakren bad ki ruh, kata kiba aijingshakri da kaba pynlut pynsep hi na lade khlem kino kino ki lad jingiarap na ka liang ka sorkar. “

Watla katta ka Tnad barabor ka lah ban iatehlok bad ki kynhun Seng, hynrei ban bteng ban buddien ia kaei kaba ki leh bad ban buh jingthoh lut ia kiei kiei baroh. Phim lah ban shu ai ha ki ia ka pisa bad shu khaprip noh ia ki khmat bad khmih lynti ba la pyndonkam hok ia ka pisa.

Haba pynpaw ia kane, Ngam don ka jingartatien ha ka jingmut jingpyrkhat jong nga ba ki don ki seng ha Shillong bad ha ka jylla baroh kawei kiba trei ia kane ka kam khlem kano kano ka pisa kaba ki ioh bad kin ym lah satia ban weng ia kane ka jingeh, u la ong.