Kyntu u Kyrmen Shylla ïaki khynnah skul ban kiar na u drok

Syllad | The Rising MeghalayaSeptember 6, 2019

KHLIEHRIAT: U Myntri ka tnad Revenue u ma Kyrmen Shylla ula kyntu ïaki khynnah ban kiar na u drok bad kiwei kiwei ki jingmlien ba sniew ba kin jop haka jingim pule puthi jong ki.

U ma Kyrmen ula ong ia kane ha ka jingrakhe ïaka 58th Teacher’s Day kaba long ha Khliehriat West Community Hall kaba pynïaid da ka District School Education Officer, East Jaintia Hills.

U Ma Kyrmen haba kren shuh shuh ha ka sngi burom ïaki nonghikai “ngi long kumba long mynta kadei namar ba ka jingdon ki nonghikai kiba la saiñdur ïaka jingim jong ngi.” Ula ai khublei kyrpang ïa baroh ki nonghikai kiba len lade pynioh ïa ka jingnang jingstad iaki khynnah skul bad ban saiñdur iaka lawei jong ki ba kan long kaba phyrnai.

U Deputy Commissioner, East Jaiñtia Hills District Bah FM Dopth ula ai khublei kyrpang iaki nonghikai kiba dei ki rishot kiba khlaiñ ha ka ban kyntiew ïa ka ri bad bad ki dei ruh maki kiba pynlong ia u/ka khynnah ban long ki myntoi jong ka imlang ka sahlang.

La pynkup burom ruh iaki nonghikai da ka khusnam District Award. Haka kyrdan secondary la ioh da ka Kong Patsie Marbaniang, MA Assistant Lecturer Khliehriat Higher Secondary School Khliehriat. Haka Upper Primary la ïoh da u Ma Monday Nongtdu, BA Assistant Teacher Sutnga Govt. UP School bad haka Lower Primary la ioh da ka Kong Iooluti Malang, PUC Head Teacher Holy Family RCLP Khliehriat.

The Best Scout Master la ïoh da u Ajoy Suchiang na Ambrose Memorial School Khliehriat bad Best Guides Captain ka kong Rose Mary Phawa na Little Star Secondary School Ladrymbai.