Kyntu u Lat ia ki samla pule NEHU ban pynkut ia ka jingshah thngan; kular iakren bad baroh ki kynhun ban weng ia ka jingeh

Syllad | The Rising MeghalayaNovember 9, 2024

U Lat ka Jylla u CH Vijayashankar ha ka 8 tarik u Naiwieng u la pynpaw ka jingsngewkhia halor ka jinglong jingman hapoh ka skulbah North Eastern Hill University (NEHU) namar ka jingshah thngan ba khlem pud jong ki samla pule kiba pynlong jingiakhih bad kaba lam ruh sha ka jingpoi hospital jong kiba bun ngut ki samla pule.

Ka University ka la ngat ha ka jingkhangdam kaba pura hadien ka jingiakhih jong ki samla pule hapoh ka lama jong ka North Eastern Hill University Students Union (NEHUSU) bad ba kyrshan da ka KSU-NEHU Unit naduh kine ki saw sngi ba la dep kum ka dak ban pyrshah ia ka jingmynthi jong u Vice Chancellor u Prof PS Shukla ban weng kam ia u Registrar bad Deputy Registrar.

Ha ka jingiakynduh ka jong ia ka kynhun ki nonghikai kiba dei ki nongialam jong ka NEHUTA bad MeTTA hapoh Raj Bhavan, u Lat u la pynpaw ka jingsngewkhia hadien ba u la ioh jingtip ia ka jingshah thngan jong ki samla pule ka NEHU bad kaba la dep lam ruh sha ka jingkem pang jong ki laingut ki samla pule. U la kylli pyrthew ruh ia ka jinglong jingman bad ruh halor ki jingeh jong ki samla pule kumjuh ki nonghikai bad ki non-teaching staff.

Hadien ba la pynsngap ia ka jingkyrpad jong u, ki dkhot ki la pynsngew halor ki jingeh kiba ka skulbah ka iakynduh bad halor ka jingdonkam ban shim ryngkat lang ia ki sienjam ban weng ia kine ki jingeh na ka bynta ka jingmyntoi jong ki samla pule, ki nonghikai bad baroh da kaba kyntu ia ka jingtuklar lem jong u Lat ha ka bor ka jong u kum u Chief Rector jong ka NEHU.

ka jingpynsngew ia ki mat da ka NEHUTA bad MeTTA-NEHU, u Lat u la kyrpad ia kine ki kynhun ba kin pynithuh ia ki jingeh bad tyrwa ia ki sienjam kiba lah ban pynbeit na ka bynta shipor bad ka ban neh junom.

U Lat u la aijingmut ruh ia ki ba kin phah da ka jingthoh kaba bniah bha khnang ba un lah ban shim ia ki sienjam kiba donkam. U la kular ruh ia ka jingkut jingkut jingmut ka jong u ban pynlong shuh shuh ia ki jingiakren bad ki kynhun bapher bapher kaba kynthup ia u Vice Chancellor bad ki bor Sorkar ban pynbeit ia kane ka jingeh.

U Lat u la kyrpad ruh ia ka jingiarap lem jong ka NEHUTA ban pynpoi ia ka khubor ka jong u sha ki samla pule da kaba kyrpad ruh ia ki ba kin sangeh ia ka jingshah thngan ka jong ki.U la kular ruh ia ki samla pule ba un shim ia baroh ki sienjam kiba donkam da kaba pynpaw ruh ka jingsngewkhia halor ka koit ka khiah jong ki samla pule.

Kum u Chief Rector ka NEHU u Lat u la kular ruh ba un sa ai ia baroh ki jingkyrshan kiba donkam na ka bynta ban pynbeit noh ia kane ka kam kloi katba lah khnang ban pynneh pynsah ia ka nam ka burom jong kane ka skulbah.