Kyntu u ma Comingone Ymbon iaki paidbah ban ym ngeit iaki jingpynbiej elekshon ka BJP bad TMC

Syllad | The Rising MeghalayaFebruary 19, 2023

U Ma Comingone Ymbon uba la jop la lai sien kynthih kum u MLA ka Raliang ula kyrpad biang iaki paidbah ban pynjop ia u kum u MLA ban pyndep ia shibun ki kam kiba dang sahteng bad ula kyntu ia ki paidbah ka thain ban nym ngeit iaki jingpynbeij bad iaki kular ka BJP bad TMC.

U Ma Coming ula ong ia kane haba kren haka jingialang ialap elekshon kaba long ha Nongjngi Lumtrep kaba la wan iashimbynta da ki hajar ngut ki paidbah kiba kyrshan ia u haka jingiadonlang ki MDC ka JHADC kiba kynthup ia u Lakhon Dkhar, Phasmon Dkhar, Eveningstar Teron nalor ki nongialam shnong  na ki 8 shnong na dorbar pyllun Nongjngi.

Kane ka shnong kadei kaba bun vote eh hapoh ka Raliang Constituency.

U Ma Comingone ul sngewskhem ba ki paidbah ka thain Raliang kin jied biang ia u kum u nongmihkhmat namar ba ym shym la leh shillliang iano iano bad kumjuh ruh iaki sengniam ban wanrah iaka roi ka par ka thain.

“4 ngut ki kyrtong kiba iakhun iaka elekshon ki dei ki MDC bad ki dak ki shin ki shai ba ngan jop biang ha kane ka pali kaba saw,” la ong u ma Comingone bad ula kyntu ïaki paidbah ban pynjop don burom ïa u ha kane ka kynti khnang ba un nanglah shuh shuh ban wanrah ka roi ka par ha baroh ki liang.

Kine ki MDC ki dei u ma Lakhon Biam-BJP, Robinus Syngkon-TMC, J Treilang Suchiang-UDP, Richard Lyngdoh-INC bad uwei pat u dei u MDC barim ka Nangbah Shemhok Garod-PDF.

U Bah Ymbon ula ther tyngeh ruh ïa u kyrtong ka BJP u Ma Lakhon Biam uba la kynthoh ïa u bad uba kam khlem nongrim ïaki skhim bapher bapher kiba ula pyntrei hapoh ka 3-Raliang Constituency kiba yn nym urlong khlem da ka jingprat lynti bad jingtrei shitom jong u.

“Wat la kiwei ki kynnoh kynthoh hynrei ki kam ki kren kham jam, kiba kynnoh ai kin kynnoh haba leh ïa kaba bha ka jingkyrkhu kan wan najrong”, la ong u Comingone

Ha kaba ïa dei bad ka jingpyntreikam ïaka Inner Line Permit (ILP) ha Meghalaya bad ka jingithuh noh ïaka ktien Khasi haka khyrnit kaba Phra jong riti synshar jong ka Ri India, u ma Comingone ula ong ba na ka liang ka sorkar Jylla ka la pyndep ïaka kamram hynrei na ka liang ka sorkar BJP kaba ialam iaka sorkar pdeng ka sngap man man ia kine ki ishu bad mynta kala wan ban pynbiej ia u paidbah.