Kyntu u MDC ka BJP ban pyllait noh mardor ia ka scholarship ki samla pule

Syllad | The Rising MeghalayaNovember 21, 2023

U MDC ka BJP na Tura, u Bernard N Marak haka sngi ba Ar u la kyntu ia u Myntri ka Tnat pule puthi ka jylla u Rakkam A Sangma ba un iakren bad ka sorkar pdeng na ka bynta ban pyllait noh mardor ia ka scholarship jong ki samla pule.

Ha ka shithi sha Myntri, u Marak u la ong ba ka jingpynslem ban pyllait ia ka scholarship ka la ktah jur ia ki hajar ngut ki samla pule ha ka jylla. Namar kane kiba bun ki khynnah pule kim lah ban siew lut ia ka bai skul bad kim lah ban pyndap ia ki form na ka bynta ban ialeh ia ki eksam jong ki.

“Kane ka dei ka mat kaba khia shibun, bad nga kyrpad jur ia une u myntri ba un shimkhia ia kane ka bynta khnang ban lah ban pyllait noh mardor ia ka scholarship sha ki khynnah pule khnang ba kin lah ban siew dep ia ki bai skul jong ki,” ong u Marak.

U Marak u la ong ruh ba ha ka jingsngew ka jong u, ka Umbrella Scholarship ka dei ka scholarship kaba aijingiarap pisa sha ki khynnah pule khnang ba kin lah ban pyndap ha kaba iadei bad ka jingsiew ia ki bai skul, kot bad kiwei pat ki jinglut jingsep kyngba ka National Scholarship Portal (NSP).

“Ki samla pule kumba ka long mynta ki la don hapdeng ka jingeh bad jingsngew kutlad namar ka jingshah banbor na ka bynta ban siew dep ia ki bai klas lem bad kiwei pat ki jinglut jingsep hapoh ki jaka pule ha kaba ki jaka pule ki la kyntait ban ai admit ia ki admit card na ka bynta ban thoh ia ki eksam jong ki,” ong u MDC ka BJP.

Ha ka juh ka por u kyntu ruh ia ka NEHU ba kan pynjlan katto katne por na ka bynta ban ailad ia ki khynnah ba kin pyndap ia ki form eksam jong ki.U la ong ba ka jingbym ailad halor kiba kum kine ki mat kiba donkam kan pynduh noh ia ki hok jong ki samla pule bad kan pynduhnong shibun ia ki, kata ki bym dei satia ban wan jia, ong une u MDC lyngba ka shithi sha u Myntri ka sorkar jylla.