Kyntu u MDC ka BJP ia ka Sorkar Jylla ban pynpaw halor ka jingkular aikam haduh 5 lak tylli ia ki samla

Syllad | The Rising MeghalayaSeptember 30, 2024

U nongialam ka BJP uba dei ruh u MDC ka Tura u Bernard N Marak u la pan jingtip na ka sorkar Jylla ba la lamkhmat da u Conrad K Sangma kum u Myntri Rangbah halor ki sienjam ba la shim ban pynurlong ia ki jingkular elekshon ban aikam ai jam sha ki 5 lak ngut ki samla ka Jylla.

Ha ka shithi sha u Myntri Rangbah ka Jylla ha ka 29 tari Nailur, u Bernard u la ong, “Nga kwah ban kylli na ka sorkar jong phi ia ki sienjam ba la shim ban pynurlong ia ki jingkular ha ka por elekshon ryngkat ka jingpynbna ban ai kam sha ki 5 lak ngut ki samla bad ki nongshong shnong ka Jylla.”

“Ka jingpynthikna ka jong phi sha ki samla ba lada phin wan biang ha ka bor kum u Myntri Rangbah ka Jylla phin pynioh haduh 5 lak tylli ki kam ki jam na ka bynta jong ki ka dei tang kane ka jingkyrmen ia ki samla kiba don hapdeng ka jingiaksaid ha ka Jylla. Baroh ngi ngeit ban long u Myntri Rangbah yn lah ban ai kam kaba neh (permanent) ia haduh 5 lak ngut ki samla khamtam mynta phi la ioh ia ka jingbud paid,” u la ong.

Une u MDC ka BJP u la ong ruh ba ki samla ki la kyrshan ia ka party NPP da ka jingkyrmen bad ka jingkhmih lynti, hynrei la iohi kumba ka don ka jingduh jingkyrmen hapdeng ki samla kiba la nang la stad, kiba hadien ba la pyndep ia ki jingpule kiba shalor ki la shu kut khlem kam khlem jam, bad ka jingiaksaid ban ioh ia ka jingim kaba kham biang la iohi ba ka la shu kut noh ha ka jingeh kaba iai bteng haba ia nujor bad kito kiba riewspah bad kiba don ha ka bor.

U la ong ruh ba dang shen ka ladon ka jingjied na ka bynta ki kam Nurse, Home Guard lem bad kiwei pat ki kam, hynrei la iohi ba kam shym la don stia ka jingleh hok ha kaba rukom jied kumba la kdew ruh da ki katto katne ki samla.

“Nga duwai ba kum kine kiei kiei kim dei ban jia ha ka jylla jong ngi namar ka jylla jong ngi ka dei kaba la tip kum ka Jylla jong ki Khristan. Nga jin da la ai jingmut ba dei ban pynlong da ka rukom jied kaba hok khnang ba kan ym don ka jingshah pynduh ia ki hok jong ki nongiakhun ia ki eksam.Nga la ioh pdiang ia ki jingujor bad ki jingpynpaw jingeh na kito kiba aplai namar ki sheptieng ba ka lah ban don ka kam leh thok,” ong u Marak da kaba bynrap, “Lait na kito kiba aplai mynta, nga la ioh pdiang ia ki jingujor na kito kiba aplai mynta, kito kiba la shah pynrung ha ka kam ruh ki la pynpaw ia ka jingsgewkhia ka jong ki.Kito kiba la shah thung kum ki nongtrei ASHA, AGANWADIs, MSSAT, ki nonghikai Adhoc bad Sorkar, ki nongtrei ka tnad ka koit ka khiah (ha ki Civil hospitals, CHC, PHCs, HC), ki Muster roll kiba trei ha ki tnad bapher bapher,  ki Home guards, Nongshet ja sngi (MIdday Meal) ki la mad jingeh namar ka jingbym shim khia jong ka sorkar ha kaba iadei bad ka rukom na ka byna jong ki. Ki ASHA kiba dei ban ioh ia ka jingsiew  na ka T. 2000 sha ka T. 3000 katkum ka jingialap sain pyrthei jong phi ki dang sahkut haduh mynta. Ki nongtrei ANGANWADI ki dang hap ban ioh ia ka tulop jong ki kumba la pynthikna da ka sorkar.”

“Bun na kito kiba shah hikai hapoh ka MSSAT ki la shah weng noh na ki kam jong ki. Ka jingkhmih lynti ban ioh ia ka jingsiew jong ki ka dang long ka jingphohsniew kaba jngai bha na ka bynta kiba bun na kine ki nongtrei,” u la bynrap.

Kumta une u nongialam ka BJP u la  kyntu ia u Myntri Rangbah ka Jylla ba un peit bniah ia ki jingeh jong ki khnang ba kiba kham tlot bad kiba duk kin ym shah banbein bad khnang ba kan ym pynsah ia ka dak kaba sniew.