Kyntu u MDC ka Mynsngat Khanduli ia ki bor district ban pynioh lad jingiarap sha ki thain nongkyndong

Syllad | The Rising MeghalayaMarch 27, 2020

U MDC ka Mynsngat khanduli u ma Dawan Lyngdoh u la kyntu ia ki bor district jong ka West Jaiñtia Hills ban pynkloi ia ki lad jingiarap bam sha ki thain nongkyndong namar katkum ka jngshem jong u mynta ka sngi ula lap ba bun na ki long ïing ki bym don khaw shuh ban pynbiang ïa ki khun ki kti jong ki bad kim banse ban mih sha ïing ki trai dukan ban leit kyrpad ia ki ban plie dukan ba kin thied khaw..

Kane ka la jia namar bun na ki padbah ha nyngkyndong ruh mynta kim don u khaw uba biang ba kin ioh bam baroh shi snem da kaba rep, kumta kine ki longing ki la sdang ban shem jingeh bad mynta ka sngi ki la don katto katne ngut kiba la wan ban kyrpad ia ki trai dukan ban iarap ia ki ba kin ioh khaw ban shet. Ula la lap ba ki dukan kiba ju die khaw ha Namdong, Khanduli bad kiwei ki shnong ba marjan kim don khaw shuh namar kim don ka stock kaba biang, kumta kim lah shuh ban pynbiang ia ki briew kiba wan ban kyrpad ia ki namar ki ruh kim don khaw shuh ban die ha dukan kane ka la pynkulmar jingmut ia ki paidbah namar kim tip shuh kumno ban leh kumta nga kyrpad ia ki nongialam shnong ban peit bniah ia kum kine ki longing bad ai ka jingtip sha ki bor ba halor khnang ba kin tip ban leh ia kaba donkam khnang ba ki paidbah kin ioh ia ka jingiarap ha ka por ka ba biang.

Une u MDC ula ong ba sa kawei ka jingeh ia kiba shong sha nongkyndong bun na ki ki bym don pisa kaba biang ki shu hap ban bylla man la ka sngi ban ioh bam bad mynta ki la hap ban shong khop ha ïing bad kim ioh lad shuh ban leit bylla kane ka la buh jingeh shuh shuh ia ki ioh lehse u don u khaw ha dukan bad kim ioh pisa shuh ban thied kumta ka sorkar ka dei ban thaw ki lad ki lynti ki ba biang bad ba kloi khnang ba ki piadbah kin lait na ka jingiap thngan.

Sa kawei ka bynta nga kyntu ia ki nongialam shnong sha ki thain nongkyndong ban ai ka hukum ka ba tyngeh ia ki paidbah ban ym ia lum paidbah kumba la bthah da ka sorkar khnang ba ngin lah ban iada na kane ka jingpang Coronavirus namar kat haduh mynta bun na ki shnong kiba don kham sha kyndong kim shem la ia snohkti lang bha ha kane ka curfew ba la bthah da ka sorkar, kumta kum ki nongialam shnong ngi dei ban pyntip tikna ia ki paidbah ban ia trei lang ha kum kane ka por ba ka jingma ka ap ia ngi ngi dei ban long kiba la pynkhreh kumba la bthah da ka sorkar bad sa kawei ngi dei ban pynsngewthuh ia ki paidbah khnang ba kin ym ngiet beij ia ki khubor lamber kiba pynthame ia ki namar bun na ki riew shim kabu ki ba pynkulmar ia u paidbah lyngba ka social media, kumta khnang ban lait na kine baroh ngi dei ban pynsngewthuh bha ia ki paidbah bad ban sngap lem ia ka jingeh ba ki ia kynduh naduh ka pang ka shitom bad ka bam ka dih.