Kyntu u MDC ka War East ban pyntreikam noh ïaka Sub Station ha Amlarem

Syllad | The Rising MeghalayaJune 27, 2020

U MDC jong ka War East ma Gilroy Tariang ula ai da ka dorkhat sha u Superintending Engineer jong ka Meghalaya Energy Corporation Limited (MeECL), West Jainita Hills District ban pyntreikam noh ïaka sub station kaba don ha Amlarem ban suk ki paidbah ban ïadei kam bad kane ka ophis.

“Nga u ba soi kyrteng harum naka liang ki paidbah jong ka 1-Amlarem Constituency LA, nga buh jingkyrpad rit ha khmat ka burom ba sbun jong phi, ban sngewbha ban phah pyntreikam noh ia ka Sub-Division jong ka MeECL kaba don ha Amlarem khnang ba kan pynsuk ia ki briew jong katei ka thain baroh namar haduh mynta ki briew na katei ka thaiñ ki hap wan shaduh sha sor Jowai lada don kino kino ki kam ki ba iadei bad ka Office jong ka MeECL,” ong ka dorkat kaba la phah u MDC sha u Superintending Engineer ka MeECL.

Katkum ka dorkhat u MDC ka War East ula ong ba da kaba pyntreikam ia katei ka sub station kaba la don lypa ha Amlarem khnang ba kan pynsuk ia ki paidbah ka thain war baroh kawei.

Halor ka u Superintending Engineer ka MeECL ma M Patlong, ula ong ba un shimkhia ban iakren bad ki bor ba halor.