Kyntu u MDC Tura ia ka NPP ban ai pyniaid ia ka GHADC sha ka BJP lada kam lah ban bat kular

Syllad | The Rising MeghalayaSeptember 15, 2024

U nongialam ka BJP uba dei ruh u MDC ka Tura u Bernard N Marak haka 15 tarik Nailur u la kyntu ia ka party synshar National People’s Party (NPP) ba kan ailad ia ka BJP ba kan ialam ia ka Executive Committee (EC) ha Garo Hills Autonomous District Council (GHADC) lada kam lah ban pynurlong ia ki jingkular ki jong ka sha ki nongtrei ka Council.

“Ka NPP ka dei ban ailad ia ka BJP ba kan ialam hapoh GHADC lada kam lah ban bat ia la ka jong ka kular sha ki nongtrei jong ka Council,” ong u Marak lyngba u kyrwoh.

U la ong ruh ba ka NPP ka la pynmih ia ka jingpynbna ha u 2018 ban pyllait noh ia ka tulop  hapoh ka 5th Pay Commission bad naduh katei hi ka por hadien ba la mynjur ia ka mang tyngka ha ka 5th Pay Commission, hynrei ki nongtrei ki la shah thok naduh u 2018 ha ka EC barim ka NPP kiba la siew ia ka tulop katkum ka 4th Pay Commission.

Da kaba kam ba tang ka BJP kaba lah ban weng ia ki jingeh halor ki jingdkoh ha ki kam pisa hapoh GHADC, u Bernard u la ong, “Ka NPP la bun snem ka la pyrshang ban kren sha Delhi halor ka GHADC ba kam lah ban treikam.Nga don ruh ia ki sakhi ia ki shithi ba la thoh da ki Myntri jong ka NPP.”

“Ka NPP ka dei ban aiti noh ia ka GHADC sha ka BJP ba kan ialam bad ngi lah ban pynthikna ia ka jingskhem bad pynkhlain bad ban pynkhie im pat ia ka ADC hapoh ka hynriew bnai,” u la bynrap.