Kyntu u MLA ka BJP ia ka sorkar ban kyntiew ia ka Discretionary Grant sha ka T.20 lak

Syllad | The Rising MeghalayaJuly 16, 2024

U MLA ka BJP ka South Shillong u Bah Sanbor Shullai ha ka 16 tarik Naitung u la kyntu ia ka sorkar Jylla ba kan kyntiew noh ia ka Discretionary Grant jong ki MLA na ka T. 10 lak sha ka T. 20 lak.

Haba kren sha ki lad pathai khubor, u Bah Sanbor u la ong, “Ha ba ka por ba Nga dang long nyngkong kum u MLA ha u snem 2008, kane ka song jingiarap pisa ka dang long tang T.3 lak, bad hadien ka la kiew sha ka T.5 lak bad mynta sha ka T.10 lak shi snem. Dang shen ha ka jingialang bad u Lamphang ha ka jingiadon lang u Myntri Rangbah bad u Symbud Myntri Rangbah, nga la ai jingmut ban kyntiew noh ia kane ka song pisa sha ka T.20 lak naduh u snem 2025.”

U la ong ruh ba kane ka song pisa ka dei kaba la mang kyrpang sha ki MLA khnang ba kin lah ban ai ia ki lad jingiarap pisa sha ki nongshong shnong kiba donkam kyrkieh ia ki lad jingiarap ha la ki jong ki constituency.

Nalor kata u la ong ba baroh ki MLA ki dei ban aiti ia ki Utilization Certificate (UC) ha ryngkat ki bill khnang ba kin ioh ia ka song pisa. U la bynrap ruh ka shong ha uwei pa uwei u MLA kumno ba kin pyndonkam ia kane ka song pisa na ka bynta ki paidbah hapoh ki constituency lane shabar jong ki constituency.

Katkum ka jingpynpaw ka jong u, u Bah Sanbor u la ong ba ki MLA kim lah satia ban ong ba kim lah ban aijingiarap pisa sha ki paidbah.

“Ka jingthmu jong kane ka Discretionary Grant ba la pynioh sha baroh ki 60 ngut ki MLA ka long ba kin aijingiarap song pisa sha ki paidbah. Lada ki MLA kim kwah ban pyndonkam ia kane ka song pisa, ki lah ban thoh sha ka legislative Assembly, da kaba pynpaw ba kim kwah satia ia kane ka song pisa,” bynrap u Bah Sanbor.