Kyntu u MLA ka Mawryngkneng ia ki samla ban kiar raimaw raidieng na u drok

Syllad | The Rising MeghalayaOctober 7, 2023

Ki samla ki dei ban kynmaw ban kiar raimaw raidieng na u drok bad kiwei pat ki jait jingdih pynbuaid, ong u Bah HS Kharpran MLA ka Mawryngkneng haba aijingkren ha ka jingialang ba la pynlong da Seng Ieng Rasong Sports Social and Cultural Club (IRSSCC), Shillong ha ryngkat ka jingiatreilang bad ka Yess Meghalaya ha ha Community Hall Nongmensong Shillong ha ka 3 tarik mynta u bnai halor ka mat “Drug Abuse and a menace to the Society.” 

U MLA uba dei ruh u Adviser jong ka Seng u la pynpaw ruh halor ka jingdonkam ban pynlong ia kum kine ki jait prokram sha ki thain Nongkyndong namar kiba kum kine ki jait jingdih ba shyrkhei ki la sdang ban suhthied. U la ong ba ka jingkyrni ia kine ki jait jingdih ka ktah jur ia ka long briew manbriew.

Ha kane ka prokram ba la pyniaid da ka Kong Lydia L Khongsngi Social Secretary jong ka Seng la ioh ruh ka jingkren na u Bah D Khonglah Deputy Rangbah Shnong jong ka Dorbar Shnong Nongmensong kumjuh ka jingkren bad jingduwai na u Pastor Bidonbok Syiem uba la ban jur shaphang ki khynnah samla ha kine ki sngi ba mynta kiba la ngop ha ka jingkyrni ha ka jingdih drok. U la ong ruh ba dei ban pynbun kum kine ki prokram iasyllok ban pynshai bad pynsngewthuh sha ki samla kiba kyrni ha u drok.                          

Hadien la pynbud sa ka jingkren na u bah Meban Tariang Councellor jong ka KRIPA Foundation uba la ngop teng ha kum kine ki jingdih pynbuaid bad mynta uba la kylla noh sha ka jingim bathymmai bad trei hapoh KRIPA Foundation mynta lah buntylli ki snem.U la ai jingmut ruh ia ki khynnah samla shynrang bad kynthei ba ki dei ban kiar na kine ki jingdih ba sniew kum u drok bad kiwei kiwei pat. U la ong ruh dei ban ainguh bad buh jingduwai ia u Blei ba un pyllait na kum kine ki jingdih na ka jingim jong ki.

Kiwei pat kiba la aijingkren ki kynthup ia ka Kong Rosana Lyngdoh Director jong ka Impulse NGO Network Shillong. Ha ka jingkren jong ka, kala ong ba na ka liang jong ka Impulse NGO ki la trei na ka bynta ka Human Trafficking shaphang jong u drok bad Ila ban jur ruh ia kane ka jingkyrni ka pynkylla ia ki briew ban thok bad ban tuh ban thiem bad ioh thied ia u drok.

Ka la kyntu jur ruh ia ki Dorbar Shnong bad ka Sorkar kumjuh ban thaw ki lad ki lynti ban pynbun ia ki Rehabilation Centre ha ki District bapher bapher.

La pynkut ia ka jingialang da ka jingkren na u Bah D Lamare General Secretary jong ka Seng uba la ai khublei kyrpang ia ka Dorbar Shnong Nongmensong ba ki ai jingbit ban pynlong ia kane ka prokram kaba jop kumjuh ia baroh kiba la wan iashim bynta ha kne ka prokram, kata naduh ki Seng Samla, Seng Longkmie, ki Asha bad Aganwadi nalor ki khynnah skul jong ka thain Nongmensong.